एजेन्सी ।
अफगानिस्तानको राजधानी काबुलमा रहेको विमानस्थलमा अझै पनि १० हजार नागरिक पुगेको अमेरिकाले दाबी गरेको छ । विमानस्थल पुगेका १० हजारले काबुल छाड्ने कोशिस गरेको अमेरिकाले दाबी गरेको हो ।
अमेरिकी अधिकारी मेजर जनरल हैंक टेलरले धेरै भन्दा धेरै मानिसलाई सुरक्षित तरिकाले बाहिर निकाल्न आफुहरु केन्द्रीत भएको बताउनुभयो । उहाँका अनुसार हिजो मात्रै ४२ अमेरिकी सैन्य विमानले ११ हजार २ सय अमेरिकी र ४८ सहयोगी देशका ७ हजार ८ सय नागरिकलाई अफगानिस्तानबाट बाहिर निकालेको छ ।
अमेरिकालाई अफगानिस्तानबाट फर्कन ३१ अगष्ट अर्थात आउँदो मंगलबारसम्मको समय दिइएको छ । यसैबीच तालिवानले अफगान कलाकृति र अमेरिकी डलर अफगानिस्तानबाट बाहिर लैजान रोक लगाएको छ । तालिवान प्रवक्ताले अमेरिकी डलर वा अफगान कलाकृति बाहिर लैजान लागेको भेटिए कानुन अनुसार कारवाही हुने चेतावनी दिएका छन् ।