कनिका संवाददाता
जेठ २८, खोटाङ
खोटाङको हलेसीमा निर्माणाधिन अवस्थामा रहेकोे बृहत पम्पिङ खानेपानी आयोजनाको काम प्रभावित भएको छ । विश्वभर माहामारीको रुपमा फैलिएको कोरोना भाइरसको सङ्क्रमण न्युनिकरणका लागि राज्यले लागू गरेको बन्दाबन्दीका कारण दूधकोशी नदीको पानी लिफ्टिङको काम प्रभावित बन्न पुगेको हो ।
९६ करोडको लगानीमा बृहत पम्पिङ खानेपानीको काम करिब तीन वर्षअघिदेखि सुचारु भएको कामको जिम्मा दिवा–महादेव खिम्ती जेभीले वि.सं.२०७६ साल पुस १७ गतेसम्ममा काम पुरा गर्ने सम्झौता भएको थियो । दूधकोशीको पानीलाई हलेसी तुवाचुङ नगरपालिकाको भुम्जुडाँडा र काभ्रेडाँडामा निकालेर कम्तिमा तीन हजार सात सय ५६ घरधुरीलाई वितरण गर्ने उद्देश्यले वितरण उक्त आयोजनाको काम थालिएको थियो ।
बन्दाबन्दीले सिमेन्ट, डण्डी लगायतका निर्माण सामग्री ल्याउन समस्या भएकाले खानेपानीको काममा ढिलासुस्ती भएको हलेसी तुवाचुङ नगरपालिकाका प्रमुख इवन राइले जानकारी दिनुभयो ।
