कनिका डेस्क
फागुन ५, दाङ ।
आज प्रधानमन्त्री निवास बालुवाटारमा बसेको सत्ता गठबन्धनको बैठक बिना निष्कर्ष टुङ्गिएपछि प्रधानमन्त्री शेरबहादुर देउवा एमाले अध्यक्ष केपी शर्मा ओलीलाई भेट्न बालकोट पुगेका छन् । बालकोट पुगेका प्रधानमन्त्री देउवाले एमाले अध्यक्ष ओलीसँग वार्ता सकेर बाहिरिएका थिए । बालकोटबाट बालुवाटारका लागि हिँडेका प्रधानमन्त्री फेरि बालकोट फर्किएका छन् । उनी अर्को चरणमा छलफलका लागि पुनः बालकोट फर्किएका हुन् ।
अहिले एमालेका एक दर्जन नेताहरु पनि बालकोटमा भेला भएका छन् । बालकोटमा भेला भएपनि एमालेका अन्य नेताहरु भने बैठकमा सहभागी छैनन् ।
एमसीसीका विषयमा छलफल गर्न आज बिहीबार बेलुका प्रधानमन्त्री निवास बालुवाटारमा डाकिएको बैठकमा सहमति नजुटेपछि राजनीति वृत्तमा फरक तरङ्ग देखिने सम्भावना बढेको छ । प्रधानमन्त्री शेरबहादुर देउवाले डाकेको बैठक २ घण्टा बढी समय बसेको थियो । बैठकमा समस्याको गाँठो फुकिनेभन्दा झन नयाँ नयाँ गाँठो पर्न थालेपछि सत्ता गठबन्धनमा खटपट आउने सङ्केत देखिएको छ ।
गठबन्धनको बैठकले झन नयाँ सवाल उब्जाएपछि सहमतिका लागि हरप्रयास गर्दा पनि सहमतिको वातावरण जुट्न सकेन । नेकपा माओवादी केन्द्र र नेकपा एसले एमसीसी अझै सदनमा टेबल नगर्ने अडान राखेका छन् । सदनको अबरोध हटेपछि मात्र एमसीसी टेबल गर्न सहमत हुनेमा केन्द्रका अध्यक्ष प्रचण्ड र नेकपा एसका अध्यक्ष माधव नेपालको अडान रह्यो ।
दुई घण्टा लामो परामर्शमा सहमति नभएपछि बैठक टुङ्गाएर प्रधानमन्त्री शेरबहादुर देउवा नेकपा एमालेका अध्यक्ष केपी शर्मा ओलीलाई भेट्न बालकोट पुगेका छन् । प्रधानमन्त्री देउवा श्रीमती आरजु राणासँगै ओली निवास बालकोट पुगेका हुन् । प्रधानमन्त्री देउवाको बालकोट संवादलाई अर्थपूर्ण ढङ्गले हेरिएको छ ।
प्रधानमन्त्री देउवा बालकोट हिँडे लगत्तै माओवादी केन्द्रका अध्यक्ष प्रचण्डका स्वकीय सचिव रमेश मल्लले गरेको ट्वीटले गठबन्धनमा खटपट आउने संकेत गरेको छ । स्वकीय सचिव मल्लले लेखेका छन्, ‘एमसीसी पास गर्न सत्ता साझेदार दलहरु तयार नदेखिएपछि प्रधानमन्त्री देउवा केपी ओलीलाई गुहार्न बालकोट पुगेको लेखेका छन् ।’
