कनिका संवाददाता
असार ५, बझाङ
जिल्ला प्रहरी कार्यालय बझाङले भरुवा बन्दुक सहित श्रीमान श्रीमतीलाई पक्राउ गरेको छ । प्रक्राउ पर्नेमा सुर्मागाउँपालिका –२ का लोकबहादुर बोहरा र उनका कान्छी श्रीमती निर्मला विसी रहेका छन् । उनीहरूलाई गाउँ नजिकैको ओडारबाट एक थान भरुवा बन्दुक, बन्दुकमा प्रयोग हुने बारुद, केप गोली सहित प्रक्राउ गरेको प्रहरीले जनाएको छ ।
एक महिना अघि बोहराले गाउँ नजिकैकी निर्मला बिसीसँग दोस्रो विवाह गरेका थिए । बोहराले दोस्रो विवाह गरेपछि उनकी जेठी श्रीमती रेखा बोहराले प्रहरीमा बहुविवाहको मुद्दा दर्ता गराएकी थिइन् । मुद्दा दर्ता पछि प्रहरीले बोहराको खोज तलास गरिरहेको थियो ।
खोजतलास गर्दै जाँदा ईलाका प्रहरी चौकी दौलीचौरको टोलीले बिहीबार बिहान ४ बजे गाउँनजिकै रहेको ओडारमा बसीरहेको अवस्थामा दुवैलाई फेला पारेको जिल्ला प्रहरी कार्यालय बझाङका सूचना अधिकारी तथा प्रहरी निरीक्षक नेत्रबहादुर बोहराले जानकारी दिनुभयो ।
