कनिका संवाददाता
असार २२, काठमाडौं
नेपालमा थप एक सय ८० जनामा कोरोना भाइरसको सङ्क्रमण पुष्टि भएको छ । यो गत २ महिना यताकै सबैभन्दा कम सङ्ख्या रहेको हो । स्वास्थ्य तथा जनसंख्या मन्त्रालयको कोभिड १९ सम्बन्धी नियमित मिडिया ब्रिफिंगको क्रममा मन्त्रालयका प्रवक्ता डा जागेश्वर गौतमले पछिल्लो २४ घन्टामा नेपालमा थप १ सय ८० जनामा कोरोना भाइरसको सङ्क्रमण पुष्टि भएको जानकारी दिनुभयो ।
उहाँले योसँगै नेपालमा कोरोना भाइरसका कारण सङ्क्रमित हुनेको सङ्ख्या १५ हजार ९ सय ६४ पुगेको जानकारी दिनुभयो । यस्तै पछिल्लो २४ घन्टामा २ सय ६४ जना कोरोना सङ्क्रमित निको भएको भन्दै उहाँले योसँगै नेपालमा कोरोना सङ्क्रमणलाई जित्नेहरुको सङ्ख्या ६ हजार ८ सय ११ पुगेको बताउनुभयो ।
प्रवक्ता डा गौतमले बागलुंग निसिखोलाका २९ वर्षका एक जना युवकको कोरोना भाइरस सङ्क्रमणका कारण मृत्यु भएको भन्दै नेपालमा कोरोना भाइरस सङ्क्रमणका कारण मृत्यु हुनेको सङ्ख्या ३५ पुगेको पनि जानकारी गराउनुभयो ।
