कनिका डेस्क
असार २४, दाङ
विश्व स्वास्थ्य संगठनले कोरोना भाइरसको सङ्क्रमण हावाबाट पनि फैलिँदै गएको कुरा सत्य भएको बताएको छ । वैज्ञानिकहरुको एक समूहले दिएको चेतावनी पछि संगठनले हावाबाट कोरोना भाइरस फैलिने विषयमा अध्ययन सुरु गरेको छ । डब्ल्यूएचओका प्राविधिक प्रमुख डाक्टर मारिया भेन केरखोवले कोरोना भाइरस हावाको माध्यमबाट पनि फैलिएको प्रमाणलाई स्विकार गर्दै मानिसलाई झन् बढी सचेत रहनुपर्ने बताउनुभयो ।
उहाँले कोरोना भाइरस हावाको माध्यमबाट फैलिएको विषयमा प्रमाण फेला परेपनि निश्चित रुपले कसरी हावामा कोरोना संक्रमण फैलिँदै छ त्यस विषयमा भने थप अनुसन्धान भइरहेको उल्लेख गर्नुभयो । सार्वजनिक स्थान, विशेषगरि भिडभाड भएको क्षेत्र, कम हावा हुने र बन्द ठाउँमा हावाको माध्यमबाट भाइरस फैलिएको कुरा सत्य रहेको भन्दै उहाँले यस विषयमा थप अनुसन्धान गरेर प्रमाण जुटाउनु आवश्यक रहेको बताउनुभयो । यसअघि सम्म विश्व स्वास्थ्य संगठनले कोरोना भाइरस मुख्य रुपले संक्रमित व्यक्तिको नाक र मुखबाट निस्कने सूक्ष्म छिटाहरुको माध्यमबाट फैलिने गरेको बताउँदै आएको थियो ।
