पहिरो खस्दा एकै घरका दुइ जनाको मृत्यु

कनिका संवाददाता
असार २६, रुकुम पश्चिम
गए रातिदेखि परेको अविरल वर्षासँगै पहिरो खस्दा एकै घरका दुइ जनाको मृत्यु भएको छ । रुकुम पश्चिमको आठबिसकोट नगरपालिका तीनका २८ वर्षका सीता परियार र उनका ६ वर्षका छोरा हाविल परियारको घटनास्थलमै मृत्यु भएको प्रहरीले जनाएको छ । आठ बर्षका छोरी हिरा परियारलाई भने नेपाल प्रहरी र स्थानीय बासिन्दाले सकुशल उद्धार गरेको छ । आज बिहान आठबिसकोट नगरपालिका तीन स्यालाखदिमा रहेको रेझेखोलामा आएको पहिरोले तुलबहादुर परियारको घर पुरेको थियो । घरमा रहेका आमा छोराको घटनास्थलमै मृत्यु भएको जिल्ला प्रहरी कार्यालय रुकुम पश्चिमका प्रहरी प्रमुख, डीएसपी ठगबहादुर केसीले जानकारी दिनुभयो । चार जना सदस्य रहेको परिवारका तुलबहादुर परियार काम विशेषले घर बाहिरै रहेकोले सकुशल रहेको प्रहरीले जानकारी दिएको छ ।