कनिका संवाददाता
असार २६, भक्तपुर
भक्तपुर नगरपालिकाले स्थानीय पाठ्यपुस्तक “ख्वपको पहिचान” नामक पुस्तक सार्वजनिक गरेको छ । नगरपालिका क्षेत्रभित्र रहेका विद्यालयहरुमा लागू गर्ने गरी स्थानीय पाठ्यक्रम पठनपाठनको निम्ति “ख्वपको पहिचान” पाठ्य पुस्तक प्रकाशनमा ल्याएको हो ।
भक्तपुर नगरपालिकाका प्रमुख एवम भक्तपुर नगरपालिकाद्धारा गठित शिक्षा, संस्कृति तथा स्वास्थ्य समितिका संयोजक सुनिल प्रजापतिले कार्यक्रममा कम्प्युटरको माध्यमबाट पठनपाठन गरिने भर्चुअल कक्षा भक्तपुर नगरपाकिाको लागि नयाँ विषय भएको र नगरपालिकाले सञ्चालन गरेको कक्षा र प्रसारणले देश भरिका विद्यार्थीहरु लाभान्वित भएको बताउनु भयो । उहाँले स्थानीय सरकार सञ्चालन ऐन २०७४ मा व्यवस्था भए अनुसार भक्तपुर नगरपालिकाले स्थानीय पाठ्यक्म निर्माण कार्यदल गठन गरी कक्षा १ र ६, कक्षा २ र ७ गरी चारवटा कक्षामा स्थानीय पठ्यक्रम तयार गरी सोही अनुसार अध्यापन भईरहेको र आगामी दिनहरुमा थप कक्षाहरुको पाठ्यक्रम निर्माणको तयारी भइरहेको पनि बताउनु भयो ।
