कनिका संवाददाता
असार ३०, काठमाडौं
अनौपचारिक क्षेत्र सेवा केन्द्र (इन्सेक) ले लकडाउनका तीन महिनामा १ हजार १ सय १९ जना मानव अधिकार उल्लङ्घन तथा ज्यादतीका घटनाबाट पीडित भएको अभिलेख सार्वजनिक गरेको छ । प्रतिवेदनमा समेटिएका तथ्यहरू २०७६ चैत ११ गतेदेखि असार १० गतेसम्मका रहेको इन्सेकले जनाएको छ । यो अवधिमा राज्य पक्षबाट तीन जना महिलासहित ६४ जना र अन्य पक्षबाट ८ सय ४१ जना महिलासहित १ हजार ५५ जना गरी १ हजार १ सय १९ जना पीडित भएको घटना अभिलेखमा उल्लेखछ । घटनामध्ये महिलामाथि भएका ज्यादती ४ सय ७६ र बालबालिकामाथि भएका ज्यादतीका घटनामा २ सय ८४ जना पीडित भए । यो अवधिमा ११ जनालाई अमानवीय व्यवहार गरिएको, पाँच जनालाई धम्की दिइएको, १ सय १२ जना घाइते भएको, १ सय २ जनालाई कुटपिट गरिएको, ६ जनालाई अपहरण गरिएको, ३१ जनालाई गिरफ्तार गरिएको, ७२ जनाको हत्या भएको, दुई जनालाई प्रहरी हिरासतमा यातना दिइएको र जातीय विभेदका घटनामा १२ जना पीडित भएको प्रतिवेदनमा उल्लेख छ । लकडाउनका तीन महिनामा २५ जना स्वास्थ्यकर्मीमाथि दुर्व्यवहार भएकाछन् ।
मा प्रकाशित
