देवी भण्डारी
दाङ,३० असार ।
दाङमा पहिलो पटक तेश्रो मुलुकबाट आएका पाँच जनामा कोरोना संक्रमण देखिएको छ । उनीहरु पाँचै जना बबई गाउँपालिका निवासी हुन ।
बाँकेको भेरी अस्पतालमा मंगलवार गरिएको पिसिआर परिक्षणका क्रममा उनीहरुमा कोरोना संक्रमण देखिएको हो । संक्रमित बबई गाउँपालिका वडा नं ६ का ४३ र ३८ बर्षीय, वडा नं २ का २४, वडा न ३ का २८ र वडा न ४ का ४२ बर्षीय पुरुषहरुमा कोरोना पुष्टि भएको बबई गाउँपालिका अध्यक्ष भवनेश्वर पौडेलले जानकारी दिएका छन् । संक्रमित मध्य वडा नं। ६ का ४३ बर्षीय पुरुष दुवई र अन्य चार जना कुवेतबाट आएका हुन ।
‘करिव १३/१४ दिन पहिले कुवेत र दुवईबाट आएर उनीहरु क्वारेन्टाइनमा बसेका थिए’–गाउँपालिका अध्यक्ष पौडेलले भने–‘आज पिसिआर परिक्षणका क्रममा ५ जनामा कोरोना पुष्टि भएको हो ।’ कोरोना संक्रमण देखिएका पाँचै जनालाई उपचारका लागि कोरोना विशेष अस्पताल बेलझुण्डी लगिएको बबई गाउँपालिकाका अध्यक्ष पौडेलले वताए ।
उनका अनुसार पदमपुर क्वारेन्टाइनमा तेश्रो मुलकबाट आएका ५५ जना छन । उनीहरु पनि त्यही क्वारेन्टाइनमा बस्दै आएका थिए । दाङमा पहिलो पटक तेश्रो मुलुकबाट आएका नागरिकमा कोरोना संक्रमण देखिएको प्रमुख जिल्ला अधिकारी गोविन्दप्रसाद रिजालले बताएका छन् । योसंगै जिल्लामा कोरोना संक्रमितको संख्या ६ सय ३१ जना पुगेको छ । दाङमा कोरोनालाई जितेर चार सय ७९ जना घर फर्किएका छन् ।
