कनिका संवाददाता
असार ३१, काठमाडौं
कोभिड १९ संकट व्यवस्थापन केन्द्र (सीसीएमसी)ले आजदेखि पुनः उद्दार उडान गर्ने कार्यतालिका सार्वजनिक गरेको छ । सीसीएमसीले आजदेखि साउन ६ गतेसम्म ४० बढी उडान गर्ने तालिका सार्वजनिक गरेको हो । सँकृति, पर्यटन तथा नागरिक उड्डयन मन्त्रालयका सहसचिव बुद्धि सागर लामिछानेले खाडी मुलुकबाट ४० बढी उडानमार्फत् नेपाली ल्याउन तालिका सार्वजनिक गरेको जानकारी दिनुभयो । उड्डयन मन्त्रालय र परराष्ट्र मन्त्रालयसँगको सहकार्यमा सीसीएमसीले सार्वजनिक गरेको तालिकाअनुसार युएईको दुबई, सारजाह र अबुधाबी, साउदी अरबको दमाम र रियाद, कुवेत, कतार, बहराइन र मलेसियाबाट नेपाली नागरिकलाई उद्धार गरिनेछ । सीसीएमसीले नेपाल वायुसेवा निगमले १६, हिमालय एयरलायन्सले १६, एयर अरेबियाले २, फ्लाई–दुबईले २ र मलेसियाको मालिन्दो एयरले ४ वटा उडान गर्ने अनुमति दिएको छ । भाइरस संक्रमण फैलिनसक्ने भन्दै सरकारले साउन ७ गतेसम्म अन्तर्राष्ट्रिय र घरेलु उडान रोके पनि उद्दार उडान भने गर्दै आएको छ । हिजो र अस्ति भने उद्दार उडान स्थगित भएको थियो ।
