घोराही, ६ भदौ ।
दाङकाे घाेराहीस्थित महेन्द्र बहुमुखी क्याम्पसकाे गेट नजिक सुतली बम विष्फोट गराएकाे आराेपमा पक्राउ परेका दुई युवालाई जिल्ला अदालत दाङबाट म्याद थप गराई थप अनुसन्धान गर्ने प्रहरीले तयारी गरेकाे छ ।
आज बिहीबार बिहान करिब ९ बजेतिर क्याम्पसकाे गेट नजिक सुतली बम विष्फोट गराएर भाग्दै गरेका घाेराही उपमहानगरपालिका वडा नम्बर १५ का सुभम कार्की र अभियान थापालाई प्रहरीले पक्राउ गरेकाे हाे ।
थप अनुसन्धानका लागि मुलुकी आचार संहिता,२०७४ को परिछेद-७ अन्तरगत बिष्पोटक पदार्थ सम्बन्धी कसुरमा अदालतबाट म्याद थप गर्ने तयारी रहेकाे प्रहरीले जनाएको छ
रा ८ प ३३२३ नम्बरको मोटरसाईकलमा आएका उनीहरूले जुटको बोरीमा बेरेर शङ्कास्पद वस्तु फालेका थिए । शङ्कास्पद बस्तु फालेकाे केही बेरमै विष्फोट भएकाे थियाे ।
विष्फोटकाे खबर पाउनासाथ घटनास्थलमा पुगेकाे प्रहरीले मोटरसाइकलमा पछाडि सवार सुभम कार्कीलाई भागिरहेको अवस्थामा घटनास्थलबाट नियन्त्रणमा लिएको थियाे ।
मोटरसाइकल चालक अभियान थापालाई बिहान ९:३५ बजेतिर भरतपुर क्याम्पस रोडबाट पैदल भागिरहेको अवस्थामा नियन्त्रणमा लिएकाे जिल्ला प्रहरी कार्यालय दाङका प्रवक्ता राप्रसाद तिमल्सिनाले बताएका छन् । विष्फोटबाट मानवीय तथा चौपायकाे क्षति नभएको प्रहरीले जनाएको छ ।
