कनिका खबर
साउन १०, जुम्ला
जुम्लाको एक सरकारी टोलीलाई आज नेपाली सेनाले सलामी दिएर जुम्ला सदरमुकामबाट बिदाइ गरेको छ । बाजुरामा रहेको बडिमालिका भगवती मन्दिरतर्फ प्रस्थान गरेको सरकारी टोलीलाई नेपाली सेनाले सलामी दिएर बिदाइ गरेको हो । तीर्थालु र सुरक्षाकर्मी सहित प्रस्थान गरेको ५ जना बढीको सरकारी टोलीलाई नेपाली सेनाले पाँचवटा सलामी, ब्यान्डबाजा र बिगुल फुकेर सम्मानका साथ पठाएको छ । संस्कृतिविद् रमानन्द आचार्यका अनुसार परम्परादेखि नै हरेक वर्षको एकपटक जुम्लाको सरकारी टोली पूजाका लागि बडिमालिका जाने चलन रहेको छ । हरेक वर्ष नाग पञ्चमीको दिन तीर्थालु सहित जुम्लाबाट सरकारी टोली बाजुरामा रहेको बडिमालिका भवतीको मन्दिर दर्शनका लागि प्रस्थान गर्ने जुम्लाका सहायक प्रमुख जिल्ला अधिकारी ओमप्रकाश देवकोटाले जानकारी दिनुभएको छ । देशव्यापी रुपमा फैलिएको कोरोना भाइरसका कारण गृहमन्त्रालयको ५ जना भन्दा बढी नपठाउनु भन्ने आदेश आदेश अनुसार र स्थानीयहरुको आवाजलाइ मध्यनजर गर्दै टोली पठाइएको छ । गएका ५ जनाको कोरोना चेकजाँच गरिएको र रिर्पाेटमा कोरोना नभएको आएको उहाँको भनाइ छ ।
फर्किसके पछि पनि गएका ५ जनाको कोरोना जाँच गराएर मात्र पुजाआजा गर्न दिने निणर्य गरिएको देवकोटाले बताउनु भयो । आज दिउँसो २ बजेतिर नेपाली सेना,नेपाल प्रहरी र सरकारी तथा गैरसरकारी निकाय लगायत सर्वसाधाणले फूलमाला, अबिरसहित पञ्चेबाजाका साथ सरकारी टोलीलाई बिदाइ गरेको निमित्त प्रमुख जिल्ला अधिकारी ओमप्रकाश देवकोटाले जानकारी दिनुभयो । जिल्ला प्रशासन कार्यालय जुम्लाका खरिदार हरिहर काफ्ललेको नेतृत्वमा प्रस्थान गरेको सरकारी टोली १६ दिनपछि जुम्ला सदरमुकाम आइपुग्ने उहाँले बताउनु भयो । दरबार मालिका भगवतीको मन्दिरमा गएर भगवतीको झोली र तीर्थालुलाई परिक्रमा गराएपछि उक्त सरकारीटोलीलाई बाजुरातर्फ पठाइएको हो । जिल्ला प्रशासन कार्यालयको तर्फबाट सुनको टीका, बिनायो, चाँदीको काँगियो, छत्र, मुरुली गरी ५ वटा पूजाका सामानहरू पनि पेटारो नामक झोलीमा राखेर बडिमालिका मन्दिरमा पूजाका लागि पठाइएको जिल्ला प्रशासन कार्यालय जुम्लाले जनाएको छ ।
