कनिका खबर
साउन ११, दाङ
नेपालमा पछिल्लो २४ घण्टामा थप एक सय ३० जनामा कोरोना भाइरसको सङ्क्रमण पुष्टि भएको छ । यससँगै कोरोना संक्रमितको जम्मा संख्या १८ हजार ६ सय १३ पुगेको स्वास्थ्य तथा जनसंख्या मन्त्रालयले आज नियमित जानकारी गराउने क्रममा जनाएको हो । पछिल्लो २४ घण्टामा ७५ जना कोरोना सङ्क्रमित डिस्चार्ज भएको मन्त्रालयका प्रवक्ता डा. जागेश्वर गौतमले जानकारी दिनुभयो । उहाँका अनुसार यससँगै हालसम्म १३ हजार एक सय २८ जना कोरोना संक्रमित डिस्चार्ज भएका छन् ।
हालसम्म देशभर १७ हजार नौ सय तीन जना क्वारेन्टाइनमा रहेको मन्त्रालयले जनाएको छ । यस्तै हालसम्म देशभर पाँच हजार चार सय ४० जना सक्रिय सङ्क्रमित रहेका छन् । यसैविच पछिल्लो २४ घण्टामा काठमाडौँमा थप आठ जनामा कोरोना भाइरसको सङक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार राष्ट्रिय जनस्वास्थ्य प्रयोगशाला टेकुमा गरिएको परीक्षणमा दुई तथा शुक्रराज ट्रपिकल तथा सरुवा रोग अस्पताल टेकु र स्टार अस्पताल सानेपामा गरिएको परीक्षणमा तीन–तीन जनामा कोरोना देखिएको हो ।
