कनिका खबर
साउन १८, मुगु
मुगुमा रहेका विश्वका चार धाम मध्येको छायानाथ धाममा जिल्ला भन्दा बाहिरका भक्तालु लुकिछिपी प्रवेश गरेको पाइएको छ । गत साउन सात गते जिल्ला प्रशासन कार्यालय मुगुमा बसेको सर्वदलीय बैठकले जिल्ला बाहिरबाट भक्तालु आउन नदिने निर्णय गरेको थियो । जिल्लाको पुर्वी करान भेगमा पर्ने मुगुमकार्मारोग गाउँपालिकाको छायानाथ धाम र छायानाथ रारा नगरपालिका वडा नम्बर १२ मा पर्ने ऋणिमोक्क्ष तिर्थ स्थलमा बाहिरी जिल्लाका भक्तालु लुकिछिपि तीर्थमा प्रवेश गरेको जिल्ला प्रशासन कार्यालय मुगुले जनाएको छ । हाल उक्त स्थानमा छिमेकी जिल्ला जुम्ला, हुम्ला लगायत बाजुराबाट तिर्थालु आएको प्रमुख जिल्ला अधिकारी कृष्ण कुमार निरौलाले बताउनुभयो ।
जिल्ला बाहिरकालाई तिर्थयात्रा गर्न नदिने सम्बन्धित स्थानीय तहलाई जिल्ला प्रशासनले परिपत्र गरेको छ भने जिल्लावासीले पनि भिडभाड गरेर तिर्थ यात्रा नगर्न जानकारी गराएको छ ।