काठमाडौँ । हेटौंडा–काठमाडौं जोड्ने दुई सडकमा दिनसम्म बेलुकाको समयमा सवारीसाधन सञ्चालनमा रोक लगाइएको छ । मकवानपुरका प्रमुख जिल्ला अधिकारी स्किम श्रेष्ठले एक सूचना जारी गर्दै हेटौंडा–काठमाडौं जोड्ने कान्तिलोकपथमा आजदेखि असोज २० गते बेलुका ४ः०० बजेदेखि बिहान ६ः०० बजेसम्म र हेटौँडा–भैँसे–काठमाडौँ सडकमा बेलुका ५ः०० बजेदेखि बिहान ६ः०० बजेसम्म सवारीसाधन सञ्चालनमा रोक लगाइएको जानकारी दिएका हुन् ।
जल तथा मौसम विभागद्वारा जारी मौसम पूर्वानुमान सम्बन्धी सूचनाबमोजिम असोज १७ देखि २० गतेसम्म जिल्लामा मध्यमदेखि भारी वर्षाको सम्भावना रहेको परिस्थिति ख्याल गर्दै यी दुवै सडकमा बेलुका सवारीसाधन सञ्चालनमा रोक लगाइएको सूचनामा उल्लेख छ।
त्यस अवधिमा अत्यन्त जरुरी कामबाहेक टाढा र रातिको यात्रा नगर्न आग्रह गर्दै प्रजिअ श्रेष्ठले पहिरोको जोखिममा रहेका तथा नदीकिनारका बस्तीमा धनजनको क्षति हुन नदिन सबै स्थानीय तहलाई उच्च सतर्कता अपनाउन आग्रह पनि गरेका छन्।
विपद् पूर्वतयारी र प्रतिकार्यमा जुट्न सबै साझेदार संस्था, जिल्ला विपद् व्यवस्थापन समिति तथा स्थानीय विपद् व्यवस्थापन समितिको नियमित समन्वय र सम्पर्कमा रही सतर्क रहन पनि आग्रह गरिएको छ।
