दाङ — नेपाली काङ्ग्रेस दाङको नेतृत्व केही समयका लागि नयाँ व्यवस्थापनमा गएको छ। जिल्ला सभापति शंकरप्रसाद डाँगी घरायसी कामका सिलसिलामा अमेरिका भ्रमणमा रहेपछि पार्टीको कार्यवाहक सभापतिको जिम्मेवारी जिल्ला उपसभङ गिरिराज सुवेदीलाई दिइएको छ।
यो केवल औपचारिक जिम्मेवारी हस्तान्तरण मात्र होइन, जिल्लाको राजनीतिक वृत्तमा यसको आफ्नै सन्देश र अर्थ पनि खोजिन थालेको छ। लामो समयदेखि नेपाली काङ्ग्रेसको संगठन निर्माण, कार्यकर्ता समन्वय र स्थानीय राजनीतिक गतिविधिमा सक्रिय रहँदै आएका सुवेदीलाई नेतृत्वको जिम्मेवारी दिइनुलाई पार्टीभित्र अनुभव र निरन्तरताको भरोसाका रूपमा हेरिएको छ।
दाङको राजनीतिक परिवेशमा सुवेदी पुराना र प्रभावशाली नेतामध्ये एक मानिन्छन्। पार्टीका विभिन्न तह र अभियानमा सक्रिय उपस्थिति जनाउँदै आएका उनले संगठनलाई जोड्ने र संवादमार्फत अघि बढाउने शैली अपनाउँदै आएको नेताहरू बताउँछन्।
सभापति डाँगी केही हप्तापछि फर्किने अपेक्षा गरिए पनि त्यस अवधिमा पार्टीका नियमित कार्यक्रम, संगठनात्मक समन्वय र जिल्लास्तरीय निर्णय प्रक्रियालाई निरन्तरता दिने जिम्मेवारी सुवेदीको काँधमा रहनेछ।
नेपाली काङ्ग्रेस दाङ अहिले स्थानीय राजनीतिक गतिविधिदेखि संगठन सुदृढीकरणसम्मका विभिन्न विषयमा सक्रिय रहेकाले कार्यवाहक नेतृत्वले पार्टी गतिविधिलाई कसरी अघि बढाउँछ भन्ने विषय पनि चासोका रूपमा हेरिएको छ। नेतृत्व परिवर्तन स्थायी नभए पनि यसले पार्टीभित्र जिम्मेवारी हस्तान्तरण, विश्वास र नेतृत्वको निरन्तरताको अभ्यासलाई भने पुनः एकपटक देखाएको छ।
