नुवाकोट । भोटेकोशी बाढीका कारण नियमित सेवन गर्दै आएका औषधि गुमाएका ज्येष्ठ नागरिकलाई लक्षित गरी नुवाकोटको विदुर नगरपालिका–३, सिर्खलीमा निःशुल्क स्वास्थ्य शिविर सञ्चालन गरिएको छ ।
भदौ २० गते सञ्चालन गरिएको शिविरबाट दुई सय जनाले स्वास्थ्य सेवा लिएका थिए । सेवा लिनेमा एक सय एक जना ज्येष्ठ नागरिक थिए। तीमध्ये ४८ जना महिला र ५३ जना पुरुष रहेका थिए ।
बाढीका कारण सुगर, प्रेसरलगायत नसर्ने तथा दीर्घरोगका नियमित औषधि गुमाएका प्रभावितलाई शिविरमार्फत स्वास्थ्य परीक्षण, विशेषज्ञ चिकित्सकीय परामर्श तथा आवश्यक औषधिसम्बन्धी सेवा उपलब्ध गराइएको थियो । शिविरमा ज्येष्ठ नागरिक रोग, हाडजोर्नी, मुटु तथा दन्त रोगसम्बन्धी सेवा प्रदान गरिएको थियो ।
बाढीपछि मानसिक तनावमा रहेका प्रभावित परिवारलाई लक्षित गरी २५ जना ज्येष्ठ नागरिक तथा उनीहरूका परिवारका सदस्यलाई तनाव व्यवस्थापन र मनोसामाजिक परामर्शसमेत दिइएको थियो । साथै, बाढी प्रभावित क्षेत्रमा उद्धार तथा व्यवस्थापनमा खटिएका नेपाली सेना र सशस्त्र प्रहरीका आधार शिविरलाई आवश्यक केही महत्वपूर्ण औषधिसमेत उपलब्ध गराइएको थियो ।
