कनिका खबर
भदौं ७, लमजुङ
हिमाली जिल्ला मनाङका दुई शिक्षकमा कोरोना भाइरसको सङ्क्रमण पुष्टि भएको छ । स्वास्थ्य कार्यालय मनाङका प्रमुख बद्री आचार्यका अनुसार भरतपुर नगरपालिका–११ चितवन घर भई मनाङ ङिस्याङ गाउँपालिकाको पिसाङस्थित विद्यालयमा कार्यरत ५७ वर्षका र विराटनगर–११ मोरङ घर भई ङावल आधारभूत विद्यालयमा कार्यरत ५१ वर्षका शिक्षकमा कोरोना सङ्क्रमण पुष्टि भएको हो । उनीहरूको स्वास्थ्य अवस्था सामान्य रहेको र चामेस्थित आइसोलेसनमा राखिएको छ ।
सङ्क्रमित शिक्षक सरकारले पठनपाठन सञ्चालन गर्ने निर्णय गरेपछि दुई साताअघि तराईबाट मनाङ आएका थिए । गत २ भदौमा स्वाब सङ्कलन गरिएका १८ नमुनामध्ये प्रदेश जनस्वास्थ्य प्रयोगशाला पोखरामा गरिएको परीक्षणमा दुई शिक्षकमा कोरोना सङ्क्रमण पुष्टि भएको हो । मनाङमा हालसम्म ८१ जनाको नमुना सङ्कलन गरी पिसिआर विधिद्वारा गरिएको परीक्षणमा तीनजनामा कोरोना भाइरसको सङ्क्रमण देखिएको छ भने एकजना निको भइसकेका छन् ।