काठमाडौँ । मुगुको सोरु गाउँपालिका–१ का २५ वर्षीय गणेश नेपालीको मृत्यु प्रकरणमा परिवार र पिडित पक्षले सरकारसमक्ष ६ बुँदे माग अघि सारेको छ ।
पीडित पक्षले गणेश नेपालीलाई आत्मदाह गर्न बाध्य बनाएको आरोप लगाउँदै काठमाडौं महानगरपालिकाका नगर प्रहरी तथा ट्राफिक प्रहरीलाई पक्राउ गरी ज्यानसम्बन्धी कसुरमा मुद्दा चलाउन माग गरेको छ । साथै घटनाबारे छानबिन गर्न संसदीय समिति गठन गर्नुपर्ने माग पनि राखिएको छ ।
पीडित पक्षले गणेश नेपालीलाई आत्मदाह गर्न बाध्य बनाएको आरोपमा काठमाडौं महानगरपालिकाका नगर प्रहरी तथा ट्राफिक प्रहरीलाई पक्राउ गरी ज्यानसम्बन्धी कसुरमा मुद्दा चलाउन तथा घटनाको छानबिनका लागि संसदीय समिति गठन गर्नुपर्ने, गणेश नेपालीलाई नेपालको पहिलो डिजिटल राइडर श्रमिक शहीद घोषणा गर्नुपर्ने माग राखेका छन् ।
त्यस्तै परिवारलाई सम्मानजनक जीवनयापनका लागि उचित क्षतिपूर्ति उपलब्ध गराउनुपर्ने, परिवारका सदस्यलाई रोजगारीको व्यवस्था, छोराछोरीको उच्च शिक्षासम्मको सम्पूर्ण खर्च तथा परिवारको पालनपोषणको जिम्मेवारी राज्यले लिनुपर्ने माग राखेका छन् ।
त्यस्तै राइड-सेयरिङ सेवा सञ्चालनसम्बन्धी स्पष्ट कानुन निर्माण गरी अन्तर्राष्ट्रिय श्रम मापदण्ड लागू गर्नुपर्ने र त्रिपुरेश्वरस्थित घटनास्थललाई ‘शहीद गणेश नेपाली चोक’ नामकरण गर्नुपर्ने माग राखेका छन् ।
माग पुरा नभएसम्म अहिलेसम्म गणेश नेपालीको शव उठाइएको छैन । नेपालीको शव शिक्षण अस्पतालमा रहेको छ ।
यसैबीच पीडित पक्ष र सरकारको तर्फबाट प्रधानमन्त्रीका प्रेस संयोजक दीपा दाहाल, प्रधानमन्त्री सचिवालय सदस्य सन्दीप पाण्डे, काठमाडौंका प्रमुख जिल्ला अधिकारी, काठमाडौं महानगरपालिकाका प्रमुख प्रशासकीय अधिकृत, सशस्त्र प्रहरीका प्रतिनिधि तथा काठमाडौं महानगर प्रहरी प्रमुख सहभागी वार्ता निष्कर्षमा पुगेको छन् ।
