काठमाडौँ । चीनले नेपाललाई उपलब्ध गराएको आपत्कालीन राहत सामग्री बोकेका दुई ठूला सैनिक विमान शनिबार बिहान काठमाडौँ आइपुगेका छन् ।
आइतबार बिहान चिनियाँ जनमुक्ति सेनाको वायुसेनाका दुई वटा ठूलो क्षमताका मालवाहक विमान त्रिभुवन अन्तर्राष्ट्रिय विमानस्थलमा अवतरण गरेका हुन् । ती विमानमा उद्धार उपकरणसहित चार जना चिनियाँ सुरुङ उद्धार विशेषज्ञसमेत आएका छन् ।
राहत सामग्री हस्तान्तरण समारोहमा नेपालका लागि चिनियाँ राजदूत चाङ माओमिङ, विज्ञान, प्रविधि तथा नवप्रवर्तनमन्त्री महावीर पुन र सङ्घीय संसद्का प्रतिनिधिसभा सदस्य धर्म केसी सहभागी भएका थिए । उनीहरूले चिनियाँ उद्धार विशेषज्ञलाई स्वागतसमेत गरेका थिए ।
चिनियाँ विमानहरू छेन्दुस्थित विमानस्थलबाट उडेका थिए र करिब तीन घण्टाको उडानपछि काठमाडौँ आइपुगेका हुन् । ती विमानमा पाल, कम्बल, सुत्ने झोला, सुख्खा खाद्यान्न र प्राथमिक उपचार सामग्रीसहित १३ हजार २०० थान राहत सामग्री ल्याइएको छ । सामग्रीको कुल तौल ५० टन रहेको काठमाडौँस्थित चिनियाँ दुताबासले जनाएको छ ।
