काठमाडौं । नेकपा एमालेका महासचिव शंकर पोखरेलले पूर्वप्रधानन्यायाधीश चोलेन्द्रशमशेर जबराको गिरफ्तारीप्रति आपत्ति जनाएका छन् ।
जबरालाई आइतबार बिहान काठमाडौंको महाराजगञ्जस्थित निवासबाट प्रहरीले नियन्त्रणमा लिएको थियो । पक्राउको कारणबारे प्रहरीले सुरुमा विस्तृत विवरण सार्वजनिक गरेको छैन ।
महासचिव पोखरेलले बिना कुनै प्रमाण र अभियोग पूर्वप्रधानन्यायाधीश जबरालाई गरिएको गिरफ्तारी नेपालको प्रचलित कानून र न्याय प्रणालीको गम्भीर उल्लंघन भएको बताएका छन् ।
उनले यस्तो कार्य संविधान, लोकतान्त्रिक व्यवस्था र विधिको शासनको मर्मविपरीत भएको दाबी गरेका छन् । पोखरेलले यस्तो कार्यलाई समर्थन गर्नु प्रत्यक्ष रूपमा तानाशाही प्रवृत्तिलाई प्रश्रय दिनु भएको उल्लेख गर्दै सबैलाई गलत कामको खबरदारी गर्न आग्रह गरेका छन् ।
उनको भनाइ छ- ‘बिना कुनै प्रमाण र अभियोग पूर्वप्रधानन्यायाधीश चोलेन्द्रशमशेर जबरालाई गरिएको गिरफ्तारी नेपालको प्रचलित कानून र न्याय प्रणालीको गम्भीर उल्लंघन हो। यो हाम्रो संविधान, लोकतान्त्रिक व्यवस्था र विधिको शासनको मर्मविपरीतको काम हो ।’
