काठमाडौँ । नेपाली कांग्रेसको १५औँ महाधिवेशनमा कुल ७ हजार ११४ जना मतदाता कायम भएका छन् । केन्द्रीय निर्वाचन समितिले सार्वजनिक गरेको प्रारम्भिक मतदाता नामावलीमा कुल ७ हजार ११४ जना मतदाता कायम भएको हो ।
निर्वाचन समितिका अनुसार प्रकाशित मतदाता नामावलीउपर दाबी-विरोधको को समय आज बिहान साढे ९ बजेसम्म तोकेको छ भने त्यसपछि जाँचबुँझपछि साढे ११ बजे अन्तिम नामावली सार्बजनिक गरिने समितिले जनाएको छ । समितिले छुटेका प्रतिनिधिको नाम अन्तिम नामावली सार्बजनिक गर्दा गरिने पनि स्पष्ट गरेको छ ।
समितिले आज बिहान १० बजेदेखि उम्मेदवार मनोनयन दर्ताको फारम वितरण र साढे १२ बजेदेखि ४ बजेसम्म मनोनयन दर्ताको समय तोकेको छ ।
समितिले केन्द्रीय कार्यसमितिका विभिन्न पदमा उम्मेदवारी दर्ताका लागि शुल्कसमेत तोकेको छ। सभापतिका लागि ४० हजार, उपसभापति र महामन्त्रीका लागि ३० हजार, सहमहामन्त्रीका लागि २० हजार तथा केन्द्रीय सदस्यका लागि ११ हजार रुपैयाँ उम्मेदवारी शुल्क तोकिएको छ।
उम्मेदवारी दर्ताका लागि आवश्यक कागजातसहित प्रस्तावक र समर्थकको विवरणसमेत बुझाउनुपर्नेछ। सभापतिका लागि १० जना प्रस्तावक र १० जना समर्थक, उपसभापति र महामन्त्रीका लागि सात-सात जना तथा सहमहामन्त्रीका लागि पाँच–पाँच जना प्रस्तावक र समर्थक आवश्यक पर्नेछ। केन्द्रीय सदस्यका लागि भने तीन जना प्रस्तावक र तीन जना समर्थकको व्यवस्था गरिएको छ ।
