कनिका खबर
कार्तिक ६, काठमाडौं
सरकारले नेपालमा प्रशारण हुने विदेशी टेलिभिजन च्यानलहरूमा विज्ञापनिरहित (क्लीनफीड) लागु गर्नका लागि सबै तयारी पूरा भएको जनाएको छ । आगामी कात्तिक ७ गतेदेखि क्लीनफीड लागू गर्नेगरी कानुनी तथा संस्थागत तयारी पूरा भएको सञ्चार तथा सूचना प्रविधि मन्त्री पार्वत गुरुङले जानकारी दिनुभयो । मन्त्रिपरिषद्ले गरेका निर्णय सार्वजनिक गर्न आज आयोजित पत्रकार सम्मेलनमा मन्त्री गुरुङले विज्ञापन नियमन गर्ने ऐन, २०७६ ले २०७७ कात्तिक ७ गतेदेखि क्लीनफीड लागु गर्ने व्यवस्था गरेअनुसार नै तयारी गरिएको बताउनुभयो । उक्त ऐनको दफा ६ मा नेपालमा प्रशारण हुने विदेशी च्यानलहरूमा विज्ञापनरहित सामग्री प्रशारण गर्ने र नेपाली च्यानलहरूले विदेशी विज्ञापन प्रसारण गर्दा डबिङ गरेको सामग्री प्रयोग गर्न नसक्ने उल्लेख छ । क्लीनफिड लागू गर्नका लागि विज्ञापन बोर्डको गठन गरिएको र त्यसको अध्यक्षमा मन्त्रालयका सहसचिव डिल्लीराज शर्मालाई नियुक्ति दिइएको मन्त्री गुरुङले जानकारी दिनुभयो । बोर्डले अनुगमनको लागि संस्थागत तयारी गरिसकेको र कात्तिक ८ गतेदेखि निरन्तर अनुगमन हुने पनि मन्त्री गुरुङको भनाइ छ । क्लीनफीड नभएमा कानुनअनुसार कारबाही हुने चेतावनी सरकारले दिएको छ । सरकारले विश्व बैंक समूहबाट प्राप्त हुने २ सय मिलियन अमेरिकी डलर (२४ अर्ब) रुपैयाँ सहुलियतपूर्ण ऋण लिने निर्णय पनि गरेको छ । प्रधानमन्त्री निवास बालुवाटारमा यही कात्तिक ४ गते बसेको मन्त्रिपरिषद् बैठकले विश्व बैंकको अन्तर्राष्ट्रिय विकास संस्थाबाट बजेटरी सहायताको रूपमा लिनका लागिस्वीकृति प्रदान गरेको हो । विश्व बैंकले नेपाललाई बजेटरी र गैरबजेटरी रूपमा निरन्तर सहयोग गर्दै आएको छ ।
मा प्रकाशित