कनिका संवाददाता
जेठ ९, दाङ ।
पछिल्लो अध्यावधिक अनुसार नेपालमा थप ९ जनामा कोरोना भाइरस संक्रमण पुष्टि भएको छ । योसँगै नेपालमा संक्रमितको संख्या ५१६ पुगेको छ ।
शुक्रबार राति सप्तरी, बारा, मकवानपुर र भक्तपुरमा गरी ९ जना नयाँ संक्रमितको पहिचान भएको हो । स्वास्थ्य तथा जनसंख्या मन्त्रालयका अनुसार भक्तपुरको भक्तपुर नगरपालिका वडा नं. ९ मा ४२ वर्षीया महिला, सप्तरीको बलान बिहुल गाउँपालिकामा ३५ वर्षीय पुरुष, र मकवानपुरको हेटौंडा उपमहानगरपालिका वडा नं.३ मा ५४ वर्षीया महिलामा कोरोना पुष्टि भएको हो ।
यस्तै, बाराको सिमरनगढ नगरपालिकामा २२, २७, ३०, ३४, ३८ र ४५ वर्षका ६ जना पुरुषमा कोरोना पुष्टि भएको छ । उनीहरु सबै सिमरौनगढ नगरपालिकाका बासिन्दा हुन् ।
शुक्रबार मात्रै ५९ जना नयाँ संक्रमित थपिएका हुन् । यस्तै २१ जना निको भएका छन् ।
हालसम्म निको भएकाहरुको संख्या ७० पुगेको छ ।
