ओली प्रवृत्तिलाई इतिहासबाट छिटो विदा गरौं : डा. भटराई – Kanika Khabar
Wednesday, December 8Nepali News Portal

ओली प्रवृत्तिलाई इतिहासबाट छिटो विदा गरौं : डा. भटराई

    मा प्रकाशित

कनिका डेस्क
बैशाख १३, दाङ ।

पूर्व प्रधानमन्त्री डा. बाबुराम भट्टराई ओली प्रवृत्तिलाई इतिहासबाट छिटो बिदा गर्नु पर्ने बताएका छन् । आफ्नो फेसबुकमा स्टाटस लेख्दै डा. भट्टराईले ओली प्रवृत्तिलाई भष्मासुर, हिटलर, स्टालिन र चाउचेस्कुको संज्ञा दिएका छन् । प्रष्ट रुपमा नेपाल सरकार प्रधानमन्त्री के.पी. शर्मा ओली भनेर नखुलाइएको भए पनि प्रधानमन्त्रीको शैली र प्रवृत्तिलाई नै ओली प्रवृत्ति भनिएको स्पष्ट हुन्छ । ओली प्रवृत्ति कोरोना भाइरसभन्दा पनि खतरनाक रहेको सङ्केत डा. भट्राईले गरेका छन् ।

डा. भट्टराईले प्रधानमन्त्री ओलीलाई पौराणिक पात्र भष्मासुरसँग तुलना गर्दै लेखेका छन् — यो भष्मासुर प्रवृत्ति हो , हिन्दू मिथकमा भष्मासुर भन्ने राÞक्षसले महादेवबाट उसले जसको टाउकोमा हात राख्यो ऊ जलेर भष्म हुने वरदान पाउँछ । तर उसले पछि ऋषिहरू ( कुनै शास्त्रमा महादेव स्वयम्) को टाउकोमा हात राख्न खोजेपछि विष्णुले अति सुन्दर मोहिनी रूप धारण गरेर उसलाई नृत्यमा लठ्याउँदै आफनै टाउकोमा हात राख्न लगाएर उसको वध गर्छन् ! ओली प्रवृत्तिले पनि अहिले नेपाली जनता र नेकपा पार्टीको वरदानले सत्तामा पुगेर त्यसको चरम दुरूपयोग गर्दै आफ्नै पार्टीका नेता, सांसद, विपक्षी दल, मिडिया, नागरिक अभियन्ता र आम जनता सबैको टाउकोमा हात राख्ने र आतङ्कित पार्ने हर्कत गरिरहेछ ।

भष्मासुरसँग तुलना गर्दै डा भट्टराईले प्रधानमन्त्री ओलीको कार्यशैली घातक रहेको औंल्याएका छन् ।

यसैगरी हिटलरसँग तुलना गर्दै डा. भट्टराई लेख्छन् — यो हिटलर प्रवृत्ति हो : जर्मन चान्सलर हिट्लरले कथित आर्य नस्लका शुद्ध जर्मन बाहेक यहूदी लगायत अन्यप्रति चरम घृणा र त्यसको जगमा जर्मन अन्धराष्ट्रवादको क्षणिक उन्माद जगाएर सत्ता प्राप्त गर्ने र अन्ततः दोश्रो विश्वयुद्ध जन्माएर करोडौं मान्छेको ज्यान लिएको इतिहास ताजै छ । नेपालमा पनि ओली प्रवृत्तिले मधेसी लगायतका उत्पीडित जाति र समुदायप्रति चरम घृणा र त्यसको जगमा एकल जातीय अहंकारवाद तथा अन्धराष्ट्रवादको खाँडो जगाएर सत्तामा पुग्ने र अहिले चौतर्फी वितण्डा मच्चाएर देशका सबै लोकतान्त्रिक संस्था ध्वस्त पार्दै र राज्यको अपराधीकरण गर्दै चरम संकटको स्थिति सिर्जना गरिरहेछ ।

यसैगरी स्टालिनसँग तुलना गर्दै डा. भट्टराई लेख्छन् — यो स्टालिन प्रवृत्ति होः रुसी बोल्सेभिक क्रान्तिमा लेनिन पछिको अतुलनीय योगदान गरेका स्टालिनले सत्तामा पुगेपछि सम्पूर्ण शक्ति आफ्नो हातमा केन्द्रित गरेर कम्युनिष्ट पार्टीका सबै विधिविधान र आन्तरिक जनवाद नष्ट गर्दै आफ्ना प्रतिद्वन्द्वी सबैको भौतिक सफाया गरेका थिए र अदूरदर्शी र लहडी आर्थिक नीति ( मुख्यतस् कृषि क्षेत्रमा ) लिएर लाखौं जनता भोकमरीले मर्ने स्थिति ल्याएका थिए । नेपालमा ओली प्रवृत्तिले झापा आन्दोलनमा चौध बर्ष जेल बसेको जस भजाएर पार्टीभित्रको सत्ता हत्याउने र पार्टी तथा राज्यको सत्ता प्राप्त गरेपछि पार्टी र राज्यका सबै विधि (प्रणाली भत्काएर निरंकुश बन्ने, पार्टी भित्र र वाहिरका विरोधीहरूमाथि विविध ढंगले दमन गर्ने,स्वेच्छाचारी र लहडी पाराले विकासका सपना बाँड्ने तर गलत नीति अवलम्बन गरेर देशमा चरम वेरोजगारी लगायत आर्थिक संकट निम्त्याउने, कोरोना संकटको वेला पार्टी फुटाउने खेलमा लागेर चरम गैर जिम्मेदारी र असंवेदनशीलता प्रदर्शन गर्ने काम गरिरहेछ ।

यसैगरी चाउचेस्कुसँग तुलना गर्दै डा. भट्टराई लेख्छन् —यो चाउचेस्कु प्रवृत्ति हो ः पूर्वी युरोपेली ‘कम्युनिष्ट’ देश रूमानियाका कम्युनिष्ट पार्टी सुप्रिमो तथा राष्ट्रपति निकोलाई चाउचेस्कु र उनकी पत्नी तथा उपराष्ट्रपति एलिना चाउचेस्कुले कम्युनिष्ट पार्टी र सर्वहारावर्गको आवरणमा यति धेरै भ्रष्टाचार, विलासिता ( उनको दरवार विश्वकै सबभन्दा ठुलो भवन मध्येमा गनिन्छ ), फजुलखर्च, स्वेच्छाचारिता, आफन्त र आसेपासेवाद, मनपरीतन्त्र गर्थे र पार्टी नेता र कार्यकर्ता तथा जनता यति निरीह, लाचार,पीडित थिए कि अन्ततः जनता र पार्टी कार्यकर्ता नै खुला विद्रोहमा उत्रिएर उनीहरूको अन्त्य गर्नुपरेको थियो । नेपालमा ओली प्रवृत्तिले हुर्काएको यति प्रकरणर ओम्नी प्रकरण लगायतका अनगिन्ति भ्रष्टाचार, राष्ट्रपति र प्रधानमन्त्रीको फजुल खर्च र विलासी शैली र ढाँटबाँट, आसेपासेको बाक्लो घेरा र उदण्ड शैली, मदन भण्डारी फाउन्डेशन लगायतका अनगिन्ति फÞाउन्डेशन र एनजीओ र आइएनजीओको विशाल तथा अपारदर्शी आर्थिक साम्राज्य एकातिर र अर्कोतिर संवैधानिक लगायत राज्यका अंगहरूको निरीहता, आम पार्टी कार्यकर्ता तथा जनताको दीनहीन अवस्था सबैको सामु छर्लंग छ!

प्रधानमनत्री ओलीको कार्यशैलीप्रति असन्तुष्ट देखिएका डा. भट्टराईले यथाशीघ्र ओली प्रवृतिलाई बिदा दिनु पर्ने औंल्याउँदै लेखेका छन् — अति भए पछि खति हुन्छ भनिन्छ । त्यसैले अब छिटो भन्दा छिटो सबै पार्टीहरू, संसद, अदालत, मिडिया, नागरिक अभियन्ता र आम जनताको सक्रियतामा यो कोरोनाभइरस भन्दा खतरनाक ओली प्रवृत्तिको भाइरसलाई सदाकानिम्ति विदा गरौं । नत्र यो भष्मासुरले सबैलाई सखाप पार्नेछ ।

 

"कानिका खबर डट कम"

याे नेपाली भाषाकाे डिजीटल पत्रिका हो । हामी तपाईहरुका सामु छुटै महत्वको साथ समाचार पस्कदै छाैं । हामी सधैं तपाईको सल्ला र सुझावकाे लागी अपेक्षा गर्दछाैं । हामीलाई पछ्याउनुभएकोमा धन्यवाद । हरपल तपाइको समाचार साथी कानिका खबर  [Email : [email protected]]

     
प्रतिक्रिया दिनुहोस्