कनिका डेस्क
असार १८, दाङ
म्यानमारको काचिन राज्यमा आज बिहान आएको पहिरोमा परी मृत्यु हुनेको संख्या एक सय १३ पुगेको छ । यसअघि पहिरोमा परी कम्तीमा ५० व्यक्तिको मृत्यु भएको यहाँको अग्नि सेवा विभागले जारी गरेको प्रेस विज्ञप्तिमा भनिएको थियो । तर पछि पहिरो गएको स्थलबाट थप शव निकालिएको म्यानमारको सूचना मन्त्रालयले जानकारी दिएको हो । सूचना मन्त्रालयले आज बिहानको पहिरोमा परी ज्यान जानेको संख्या बढेर एक सय १३ पुगेको जानकारी गराएको हो ।
कचिन राज्यको हपाकांत टाउनशिपस्थित गाउँमा रहेको जेड खानी क्षेत्रमा स्थानीय समयानुसार आज बिहान आठ बजे पहिरो आएको बताइएको थियो । पहिरो आएको समयमा उक्त खानीमा ठूलो संख्याका कमदारले काम गरिरहेका थिए । कैयौँ व्यक्ति काममा व्यस्त रहेको अवस्थामा पहिरो आएकोले उनीहरुलाई पुरेको आशंका गरिएको छ । सूचना मन्त्रालयले अहिले पनि त्यस क्षेत्रमा उद्धारको काम जारी नै रहेको जनाएको छ । उद्धारकर्मीले त्यस स्थलमा अरु पनि व्यक्ति पुरिएको हुनसक्ने जनाएका छन् । प्रहरीले भने यस विषयमा थप जानकारी आउन बाँकी नै रहेको जनाएको छ । अधिकारीले सन् २०१६ को नोभेम्बरमा पनि उक्त साइडमा ठूलो पहिरो आएको र यसमा परी ११६ व्यक्तिको मृत्यु भएको बताएका छन् ।
