दाङ, ७ वैशाख ।
दाङमा आगलागी हुँदा एक जनाको मृत्यु भएको छ । जिल्लाको लमही नगरपालिका वडा नम्बर ९ तरुलियामा आगलागी हुँदा १ जनाको मृत्यु भएको हो ।
मृत्यु हुनेमा लमही नगरपालिका वडा नम्बर ९ तरुलिया निवासी ८७ वर्षिय वीर बहादुर बोटे रहेका छन् ।
हिजो बिहीबार बेलुका ५ बजे स्थानीय वीरबहादुरको गोठबाट आगो सल्किएको थियो। गोठमा सल्किएको आगोले वीरबहादुरको घरसम्म पुगेको थियो ।
आगो घरमा सल्किरहेको समयमा वीरबहादुर पैसाको बाकस निकाल्न घरभित्र छिरेका थिए। पैसा लिएर निस्केपछि अन्य सामग्री निकाल्न पुनः घरभित्र छिरेका थिए।
मृतक वीरबहादुर बोटेको गोठबाट सल्किएको आगोले उनको एक घर हुँदै उनका भतिजा पर्ने हुकुमबहादुर बोटेको एक घर गरि दुई घर एक गोठ जलेर नष्ट भएको इलाका प्रहरी कार्यालय अमिलियाका प्रहरी निरीक्षक लाल बहादुर श्रेष्ठले जानकारी दिए । आज अपरान्ह ३ बजेको समयमा एक्कासी आगलागी भएको थियो । आगलागीबाट तीन वटा घर गोठ जलेर नष्ट भएका छन ।
लमही नगरपालिका र गढवा गाउँपालिकाको दमकल, प्रहरी, सशस्त्र प्रहरी र स्थानीयको सक्रियतामा आगो नियन्त्रणमा आएको हो ।
