मा प्रकाशित
काठमाडौँ, १७ वैशाख ।
आगामी असार १५ गतेभित्र विद्यालय शिक्षा विधेयक पारित गर्न सत्तारुढ दलहरू सहमत भएका छन् । गत चैत २० गतेदेखि चलिरहेको शिक्षक आन्दोलनका माग सम्बोधन गर्ने क्रममा सरकार र सत्तासिन राजनीतिक दलहरूले आगामी १५ असारभित्र नयाँ विद्यालय शिक्षा ऐन २०८२ जारी गर्ने सहमति भएको हो ।
बुधबार शिक्षक महासंघ र सरकारबिच वार्तामा यस विषयमा सहमति भएपछि सत्तारुढ दलका प्रमुख सचेतक र संसद्को शिक्षा, स्वास्थ्य तथा सूचना प्रविधि समितिका सभापतिले संयुक्त हस्ताक्षर गरेर विधेयक पारित गर्ने प्रतिबद्धता जनाएका हुन् ।
शिक्षकहरू ०८१ चैत २० गतेदेखि काठमाडौं केन्द्रित पेशागत आन्दोलनमा थिए । नेपाल सरकार र नेपाल शिक्षक महासंघबीच विगतमा भएका सहमति–समझदारीअनुसार माग सम्बोधन गर्न दलहरू सहमत भएका हुन् ।
