कनिका खबर
भदौ ४, तेह्रथुम
तेह्रथुमको म्याङ्लुङमा थप नौ जनामा कोरोना भाइरसको सङ्क्रमण पुष्टि भएको छ । ६ जना पुरूष र तीन जना महिला गरि नौ जनामा कोरोना भाइरसको सङ्क्रमण पुष्टि भएको प्रमुख जिल्ला अधिकारी विश्वराज न्यौपानेले जानकारी दिनुभयो । कोरोना सङ्क्रमण पुष्टि हुनेमा जिल्ला अदालतका कर्मचारी, तीनका परिवार र एक जना कानुन व्यवसायी रहेको प्रशासन जनाएको छ ।
विपी कोइराला स्वास्थ्य विज्ञान प्रतिष्ठान धरानमा गरिएको परीक्षणमा २५, ४९, ४३, ४४, ४३, र ५४ वर्षका पुरुष तथा ३२, ३६ र २५ वर्षका तीन जना महिलामा कोरोना सङ्क्रमण देखिएको हो । एक गते ७४ जनाको नमुना संकलन गरी परीक्षणका लागि विपी कोईराला स्वास्थ्य विज्ञान प्रतिष्ठान धरानमा पठाईएको थियो । जसमा नौ जनामा सङ्क्रमण देखिएको र बाँकी ५८ जनामा कोरोना नभएको पाइएको स्वास्थ्य कार्यालयले जनाएको छ । जिल्लामा पहिलो पटक यति धेरैको संख्यामा भाईरस सङ्क्रमण पुष्टि भएपछि प्रशासनले आजबाट लागुहुने गरी एक साताका लागि निषेधाज्ञा जारी गरेको छ ।
