कनिका खबर
भदौ ७, दाङ ।
यतिबेला गायक तथा नायक भुपू पाण्डे गीत संगीतमै व्यस्त छन् । कोरोनाको महामारी चलिरहँदा उनलाई गीत संगीतको प्यास प्याकप्याक्ती पारिरह्यो । एकातिर कोरोना कहर अर्कोतिर संगीतको लहर लिएर उनी कुदिरहे नेपाली सांगीतिक बजारमा । एउटा ‘रिस्क’ थियो, विश्व कोरोनाको महामारीमा चुर्लुम्म डुबेको बेला संगीतको सुमधुर सुर, लय र ताललाई संगीतप्रेमीको मन मस्तिष्कमा पसाल्न । आफ्ना सिर्जनामा अरुलाई रुवाउन, आफ्ना सिर्जनामा अरुलाई नचाउन, आफ्ना सिर्जनामा अरुलाई सम्मिलित बनाउन साँच्चै यो कोरोना कहरको बिचमा त्यति मामुली कुरा थिएन । त्यही ‘रिस्क’को सगरमाथा हरेक पल उनको मन मस्तिष्कमा ठडिरहन्थ्यो । त्यही उचाई उनका लोचनले हरेक विहान दृष्यावलोकन गर्दथे अनि एउटा इरादा उनीभित्र सुदृढ भएर पलाउँथ्यो, ‘रिस्क नै जिन्दगी हो ।’
‘हरेक दिनको सुरुआत विहानीमा हार्मोनियमका सारेगमसँगै खेल्दै चलिरहन्छन् । मनमा टिपिकल शब्दका खहरेहरु बगिरहन्छन्, मस्तिष्कमा नवीन सुर र तालका झरनाहरु झरिरहन्छन् ।’ सिर्जना जन्मनुभन्दाका पहिलेका अनुभव सुनाए भुपूले । उनले थपे, ‘एउटा सिर्जना जन्माउन कम्ता कठिन छैन, मान्नुस आमालाई एउटा सन्तान जन्माउन जति पीडा भोग्नुपर्छ , सिर्जना जन्माउन पनि त्यति नै सकस छ । तर आमालाई सन्तानको जन्मभित्र पीडा खुशी बनेर आउँछ हामीलाई पनि सिर्जनाभित्र सबै सकस सामान्य भइदिन्छ ।’
मोफसलका प्रायः सर्जकहरुले कोरोना कहरमा राजधानी छाडिरहँदा भुपू राजधानीमै घस्रिरहे, एउटा लक्ष्य चुम्ने इरादाका साथ । तिम्रो मायामा दम छैन.….. पूर्व भजनमा रमाउने गायक भुपू ‘मायावी’सँगै सुगम संगीतमा उदाए, त्यो पनि तेजस्वी रुपमा । संगीतका एक बहुमुखी सर्जकका रुपमा अहिले भुपूले आफूलाई स्थापित गरेका छन् । शब्द, संगीत र स्वर त आफै भर्छन् नै यसका अलावा एरेन्जको पाटोमा पनि आफूलाई अब्बल साबित गरिसकेका छन् । त्यसो त अझ उनको अभिनयको पाटो झनै ‘बोल्ड’ छ । उनी भन्छन्, ‘मलाई बोल्ड अभिनयमा मरेको लासभित्र मुटु किन चल्थ्यो र गीतले प्रवेश गरायो । ’
कोरोना महामारीका बिचमा गायक भुपूले भोकल र कम्पोज गरी एक दर्जन बढी गीतको काम गर्न भ्याए । ‘छोटो छ जिन्दगी फोटो खिचेर राख’ गीतले उनलाई गीत संगीतको ट्रेन्डिङमा पु¥यायो । ‘मोक्ष पथ’ र ‘मायावी’ स्लो एलबम नेपाली संगीतको बजारमा ल्याइसकेका छन् । पाँच दर्जन बढी गीतमा स्वर र ३ दर्जन बढी गीतमा कम्पोज गरिसकेका पाण्डे यतिबेला निकै व्यस्त भेटिन्छन् ।
