जेठ २८, दाङ ।
सभामुख अग्निप्रसाद सापकोटाले सर्वदलीय बैठक डाकेका छन् । सभामुख सापकोटाले सङ्घीय संसदमा प्रतिनिधित्व गर्ने राजनीतिक दलका प्रमुख र पूर्वप्रधानमन्त्रीहरूसँग छलफल गर्ने गरी आज शुक्रबार दिउँसो २ बजेलाई बैठक डाकेका हुन् । बैठक सङ्घीय संसद् भवन नयाँ बानेश्वरमा बस्नेछ । सभामुख सापकोटाले प्रधानमन्त्री केपी शर्मा ओलीसहित अरू दलका नेताहरूसँग पछिल्लो राजनीतिक अवस्था र राजनीतिक तरलताका बारेमा छलफल गर्न लागेका हुन् ।
सभामुख सापकोटाले प्रधानमन्त्री ओलीसहित सबैलाई लिखित निमन्त्रणा पठाएका छन् । प्रतिनिधि सभा दोस्रो पटक विघटनको घोषणा भएपछि सभामुख सापकोटाले पहिलो पटक प्रधानमन्त्री ओली, पूर्वप्रधानमन्त्री र सबै दलका प्रमुखहरूलाई छलफलका लागि बोलाएका हुन् ।
प्रतिनिधि सभा विघटन भएको अवस्थामा सभामुखका केही विशेषाधिकार प्रयोग हुन सक्ने अनुमान भइरहेका बेला उनले पूर्व सभामुखहरूसँग छलफल गर्नुलाई महत्त्वका साथ हेरिएको छ । यसअघि उनले पूर्वसभामुखहरुसँग छलफल गरेका थिए ।
