काठमाडौं, ९ पुस ।
निर्वाचन आयोगले स्थानीय तहको चुनाव आगामी वैशाख १४ गते गर्न सकिने सरकारसंग प्रस्ताव गरेका छन् । आयोगका प्रमुख निर्वाचन आयुक्त दिनेश थपलियाले सबै स्थानीय तहको चुनाव ०७९ वैशाख १४ गते बुधबारका लागि तोक्न उपयुक्त हुने सुझाव दिएका छन् ।
थपलियाले आज प्रधानमन्त्री शेरबहादुर देउवालाई भेटेर निर्वाचनबारे सुझाव समेत दिए । कुनै कारण एकै दिन निर्वाचन गर्न सम्भव नभए पहिलो चरणको ०७९ वैशाख १४ गते र दोस्रो चरणको वैशाख २२ गते गर्न सकिने उलने प्रधानमन्त्रीलाई जानकारी दिए ।
कानुन बमोजिम स्थानीय तहको निर्वाचन आगामी ०७९ वैशाख महिनामा गर्नुपर्ने आयोगले जनाएको छ । आयोगकाअनुसार स्थानीय तह निर्वाचन ऐन, २०७३ को व्यवस्था बमोजिम ०७९ जेठ ५ गते स्थानीय तहका पदाधिकारीहरूको पदावधि समाप्त हुदैछ । संविधानको धारा २२५ बमोजिम कार्यकाल समाप्त भएको ६ महिनाभित्र निर्वाचन गर्नुपर्ने व्यवस्था छ ।
आयोगकाअनुसार कार्यकाल सकिएपछि स्थानीय तह सञ्चालनसम्बन्धी कुनै स्पष्ट कानुनी व्यवस्था नभएकाले स्थानीय तह निर्वाचन ऐन, २०७३ को दफा ३ बमोजिम कार्यकाल समाप्त हुनुभन्दा दुई महिना अगावै निर्वाचन हुनुपर्ने व्यवस्था रहेको छ ।