कनिका डेस्क
असार ३, दाङ
नेकपाको स्थायी कमिटी बैठक असार १० मा बस्ने भएको छ । पार्टीभित्र एमसीसी लगायतका मुद्दामा विवाद भइरहेका बेला बैठकको मिति तय भएको हो ।
ओली र दाहालबीच बुधबार साँझ भेट भएपश्चात स्थायी कमिटी बैठकको मिति तय भएको वरिष्ठ नेता झलनाथ खनालले वताए । यद्यपि यसअघि ओली र दाहालबीच बैठक कहिले बोलाउने भन्नेमा छलफल भए पनि मिति तय भएको थिएन । स्थायी कमिटी बैठक बोलाएसंगै एमसीसीको छिनोफानो अब त्यहीँबाट हुने सम्भावना बढेको छ ।
एमसीसीलाई लिएर नेकपामा विवाद छ । एमसीसी सम्झौता कार्यान्वयनका लागि १६ असारभित्र संसद्बाट निर्णय गरिसक्नुपर्ने भएकाले नेकपा नेतृत्व छिटो टुंगो लगाउनुपर्ने दबाबमा छ । यसअघि पहिला २५ र पछि वैशाख ३१ मा बोलाइएको स्थायी कमिटी बैठक स्थगित भएको थियो ।
नेकपाका २० स्थायी कमिटी सदस्यले वैशाख १० मै पार्टी अध्यक्षद्वयलाई पत्र लेखेर बैठक बोलाउन लिखित माग गरेका थिए । तर, धेरै पछि २५ वैशाखका लागि बोलाइएको बैठक पनि अघिल्लो दिन स्थगित गरिएको थियो ।
बैठक पछिल्लो पटक मंसिर २९ देखि पुस ६ गतेसम्म बसेको थियो । पार्टी विधानअनुसार तीन महिनामा एक पटक स्थायी कमिटी बैठक बस्नुपर्ने व्यवस्था छ । तर, करिब ६ महिनादेखि बैठक बस्न सकेको छैन ।
