चैत्र २, दाङ ।
भारतले, भारतका लागि नेपाली राजदूत शंकर शर्माको नाममा सहमति (एग्रिमो) पठाएको छ ।नेपालले राजदूतका लागि सिफारिस गरेको तीन महिनापछि भारतले शर्माको नाममा हिजोको मिति राखेर सहमति पठाएको परराष्ट्र मन्त्रालयले बताएको छ ।
सरकारले कात्तिक ११ मा सिफारिस गरेका शर्माको संसदीय सुनुवाइ मंसिर २२ मा गरिएको थियो । संसदीय सुनुवाइ समितिले नाम अनुमोदन गरेपछि मङ्सिर २४ मा परराष्ट्र मन्त्रालयले भारतलाई ‘एग्रिमो’ का लागि पत्राचार गरेको थियो ।
शर्मासँगै सिफारिस हुनुभएका ज्ञानचन्द्र आचार्य बेलायत र श्रीधर खत्री अमेरिकाका लागि राजदूतमा यसअघि नियुक्त भइसक्दा भारतले भने ढिलोगरी एग्रिमो पठाएको हो ।
अब शर्माको नियुक्तिका लागि बाटो खुलेको छ । सरकारले सिफारिस गरेको व्यक्तिलाई संसदीय अनुमोदन र सम्बन्धित देशको कूटनीतिक सहमति ‘एग्रिमो’ पछि राष्ट्रपतिले राजदूत नियुक्त गर्ने कानुनी व्यवस्था छ ।
भारतका लागि सिफारिस गरिएका शर्मा राष्ट्रिय योजना आयोगका पूर्वउपाध्यक्ष र अमेरिकाका लागि पूर्वराजदूत हुनुहुन्छ ।
