चैत्र २९, दाङ ।
नेपाली काँग्रेसले एक महिने चुनावी घरदैलो अभियानको समापन गरेको छ । स्थानीय तह चुनाव केन्द्रित ‘घरघर जाऔं काँग्रेस जिताऔं’ अभियानको आज समापन गरिएको हो ।
फागुन २९ गतेदेखि काँग्रेसले घरदैलो अभियान चलाएको थियो। यसबीचमा प्रदेश, जिल्ला, पालिका, टोल र घरघरमा पुगेर अभियान सञ्चालन गरिएको प्रवक्ता डा. प्रकाशशरण महतले बताउनुभयो ।
काँग्रेसले उम्मेदवारसहित दोस्रो चरणमा चुनावी घरदैलो सञ्चालन गर्ने तयारी पनि गरेको छ। प्रवक्ता महतका अनुसार वैशाख ३० मा हुने निर्वाचनमा सत्तागठबन्धनबीच तालमेल हुनेछ ।
स्थानीय आवश्यकता र औचित्यताका आधारमा गठबन्धन गरिने केन्द्रीय समितिले निर्णय गरिसकेको पनि उहाँले बताउनुभयो । साथै चुनावी गठबन्धनका क्रममा काँगेसले केही उदारता देखाउने उहाँको भनाई छ ।