वैशाख ५, दाङ ।
स्थानीय निर्वाचन नजिकिदै गर्दा सत्ता गठबन्धनका दलहरुलाई भने सिट बाँडफाँडको चटारो परेको छ । हिजो आइतबार बसेको गठबन्धनको बैठकमा स्थानीय तहको निर्वाचनमा सिट बाँडफाँडमा सहमति कायम नभएपछि समस्या देखिएको हो ।
बालुवाटारमा बसेको गठबन्धनको स्थानीय तह निर्वाचन तयारी, परिचालन तथा अनुगमन समितिको बैठकमा चुनावी तालमेलका लागि सिट बाँडफाँटका विषयमा सहमति सकेन ।
बैठकपछि सञ्चारमन्त्री एवं कांग्रेस नेता ज्ञानेन्द्र बहादुर कार्कीले सिट बाँडफाँटको छलफल लम्बिएको जानकारी दिए । यस विषयमा आज सोमबार पुनः छलफल हुने उनले बताए । बैठकमा कुन–कुन स्थानीय तहमा कसरी उम्मेदवार खडा गर्ने भन्ने छलफल भएको उनले जानकारी दिए ।
स्रोतका अनुसार नेकपा एकीकृत समाजवादीले महत्वपूर्ण स्थानमा दाबी गरेपछि समस्या उत्पन्न भएको हो ।