कनिका संवाददाता
असार २३, काठमाडौं
नेपाल कम्युनिस्ट पार्टी (नेकपा) मा छलफलको नयाँ रणनीति अपनाउँदै अस्थायी ‘युद्धविराम’ गरिएको छ । दुई अध्यक्षले एकल छलफल गर्ने र आवश्यक परे मात्रै वरिष्ठ नेता झलनाथ खनाल, माधवकुमार नेपाललाई सहभागी गराउने सहमति भएको छ ।
हिजो सोमबारबाट नै एकल सम्वादको पहल सुरु भएको छ । आज पनि दुई अध्यक्ष प्रधानमन्त्री केपी शर्मा ओली र पुष्पकमल दाहाल प्रचण्डले एकल छलफल गर्नु हुनेछ । छलफलमा समस्या समाधानका लागि निकास निकाल्न असहज भएपछि सहयोगीलाई समेत बाहिर राखेर एक्लाएक्लै आमनेसामने बस्ने सहमति दुवै अध्यक्षबीच भएको हो । यसअघिका आपसी छलफलमा दुवै पक्षका अन्य सहयोगी नेताहरू सहभागी हुँदै आएका थिए ।
दुवै पक्षले अस्थायी युद्धविराम गर्दै वार्ताको बाटो रोजेपछि पार्टी स्थायी कमिटि बैठक फेरि भोलि बुधवारसम्मको निम्ति सारिएको छ । दुई अध्यक्षको नयाँ रणनीतिक छलफलमा नेता माधवकुमार नेपाल पक्षले भने शङ्का व्यक्त गरेको छ ।
