काठमाडौँ, १४ चैत ।
राष्ट्रिय स्वतन्त्र पार्टी (रास्वपा) का नेता रमेश खरेलले राजीनामा बुझाएका छन् । रास्वपाको सरकारमा समावेशको विषयलाई लिएर स्वार्थ बाझिने गरी गृह मन्त्रालयको नेतृत्व सम्हालेको भन्दै पार्टी सभापति रवि लामिछानेको आलोचना गरेपछि पार्टीले खरेलसँग स्पष्टीकरण माग गरेको थियो । नेता खरेलले आफ्नो अभिव्यक्तिका विषयमा स्पष्टीकरण सोधेपछि पार्टीबाट राजीनामा दिएका हुन्।
हाल स्पेस फोरके टेलिभिजनमा ‘जनता जनार्दन’ नामको कार्यक्रम चलाइरहेका उनले दुई साताअघिको अंकमा रवि लामिछानेको चर्को आलोचना गरेका थिए ।
लामिछानेले आफू गृहमन्त्रीसहित सरकारमा जाने निर्णय गरेकोप्रति आलोचना गर्दै खरेलले भनेका थिए, रास्वपा पनि उस्तै देखियो । जुन जोगी आए पनि कानै चिरेको !’
खरेलले आज बुधबारबाट लागू हुने गरी पदबाट राजीनामा पत्र पठाएका छन् । यसअघि सुशासन पार्टीका अध्यक्ष रहेका खरेललाई रास्वपाले केन्द्रीय सदस्य बनाउन खोजे पनि जिम्मेवारी लिन भने अस्वीकार गरेका थिए।
खरेल गत वैशाख १० गतेको उपनिर्वाचनमा रास्वपाको तर्फबाट बारा क्षेत्र नम्बर २ को उपचुनावमा उम्मेदवार बनेका थिए। उनी जसपा अध्यक्ष उपेन्द्र यादवसँग पराजित भएका थिए। २०७९ मङ्सिर ४ गतेको निर्वाचनमा खरेल सुशासन पार्टीका तर्फबाट काठमाडौं–१ को उम्मेदवार बनेका थिए।