दाङ, २० चैत ।
जिल्लामा कुनै बेला सुरकी ‘रत्न’ का रुपमा एक नाम चिनिन्थ्यो सुधा रत्न । स्वरको जादुमयी कलाले स्रोताहरुको मनमा राज गर्न सफल भएकी सुधा जिल्लाका सांस्कृतिक कार्यक्रममा समेत उत्तिकै खोजिन्थिन् ।
जिल्लामा बसेर मात्रै कलाकारीता नफक्रिने मनासायले सुधालाई काठमाडौँ डाेर्यायाे । काठमाडौँमा बसेर संगीत यात्रालाई निरन्तरता दिएकी सुधाले आफूलाई त्यति धेरै यो क्षेत्रमा परिस्कृत गर्न सक्षम भईनन् । फाट्टफूट्ट हुने गायकीले आफूलाई सोचे अनुसार यो क्षेत्रमा सफलता नमिलेको अनुभुत सुधालाई हुँदै गयो । फलतः अहिले बेजोड रुपमा आफूलाई उनले यो क्षेत्रमा उपस्थित गराउने योजनाका साथ सुधा अघि सरेकी छिन् ।
नवीन रावलसँगको संगीत सहकार्यले सुधाको गायकीलाई फेरि उचाई दिएको छ । केही दिन अघि सार्वजनिक भएको ‘माया बस्दै छ, भोक निद्रा भाग्दैछ’ बोलको गीतबाट सुधा आम स्रोता दर्शकको मनमा राज गरेकी छिन् । नवीन रावलको लेखन र संगीतमा रहेको यो गीतमा नवीनलाई सुधाले गज्जबको आवाजले साथ दिएकी छिन् ।
बद्री विष्ट र बिना राउतको अभिनय रहेको यो गीतले अहिले स्रोता दर्शकको राम्रो साथ पाईरहेको छ । केही दिन अघि मात्रै सार्वजनिक यो गीतपछि सुधाको अर्को गीत पनि रिलिजको तयारीमा छ ।
नजर — २ गीतबाट सुधाले आफूलाई गायकका रुपमा मात्रै हैन, मोडलको रुपमा समेत प्रस्तुत गर्दैछिन् । यो गीतमा उनले बद्री विष्टसंग नृत्य गरेकी छिन् । उनका अनुसार केही दिनमै यो गीत रिलिज हुँदैछ ।
