काठमाडौं, ३ वैशाख ।
सुदूरपश्चिम प्रदेश सरकारमा सरकार गठनकाे प्रक्रियामा केन्द्रीय सरकार सत्ता साझेदारमा असहमति बढेपछि नेकपा एकीकृत समाजवादी सरकारबाट बाहिरिने सङ्केत देखिएछ ।
पार्टीका उपाध्यक्ष राजेन्द्र पाण्डेले सहमति अनुसार गठबन्धनमा रहेका दलले पार्टीलाई जिम्मेवारी नदिएपछि जे पनि हुनसक्ने अवस्था भएको बताए हुन् । सत्ता गठबन्धनका क्रममा सुदूरपश्चिम प्रदेशकाे मुख्यमन्त्री नेकपा एसलाई दिने सहमति भए पनि अहिले आएर नेकपा एसलाई मुख्यमन्त्री नदिने निर्णय भएपछि नेकपा एस सरकारबाट बाहिरिने सम्भावना बढेकाे छ ।
‘हामीलाई दिएको जिम्मेवारी अनुसार सरकार अगाडि नबढेपछि साथीहरूले नयाँ बाटो रोजेका छन् । कुरा स्पष्ट छ । सुदूरपश्चिमको मुख्यमन्त्री हामीलाई दिने सहमति भएको थियो । त्यहाँबाट सरकार पछि हटेको छ । यस्तो भएपछि के सहयात्रा होला र ?’ उपाध्यक्ष पाण्डेले बताए ।
सत्ता गठबन्धनले सुदूरपश्चिममा आफ्नो भागमा परेको मुख्यमन्त्री नाउपालाई दिने भएपछि समाजवादी आफ्नो बाटो लागेको उनले स्पष्ट पारे ।
‘केन्द्रमा दुई वटा मन्त्री देऊ अनि हामी बाकी कुरामा चुप बस्छौँ भनेर हस्ताक्षर गरेको थियो र ? भाग अनुसार त पाउँनुपर्यो नि । सूदुरपच्चिममा कांग्रेससँग मिलेर नै सरकार बन्छ । अरू विकल्प छैन ।’ पाण्डेले बताए ।