काठमाडौँ, १० साउन।
नेपाल प्रिमियर लिग (एनपीएल)को दोस्रो संस्करणको अक्सन यही साउन २४ गते हुने भएको छ । आयोजक नेपाल क्रिकेट संघ (क्यान)ले आज शनिबार एक विज्ञप्ति जारी गर्दै अक्सनबारे जानकारी गराएको हो ।
क्यानका अनुसार, प्रतियोगिताका दोस्रो संस्करणको अक्सनका निम्ति कुल ४ सय ५८ खेलाडीले आफ्नो नाम दर्ता गराएका छन् । क्यानले जुलाई १२ देखि २२ सम्म खेलाडी दर्ताको समयसीमा तोकेको थियो ।
प्रतियोगिताको दोस्रो संस्करण क्यानले आउँदो नोभेम्बरमा गर्ने वार्षिक क्यालेन्डरमा उल्लेख छ ।
दर्ता भएका सम्पूर्ण खेलाडीहरुको विवरण एनपिएलमा सहभागी ८ फ्रेञ्चाइज टोलीहरुलाई उपलब्ध गराइ प्राविधिक समितिले तयार गरेको मापदण्ड र फ्रेञ्चाईज टोलीले इच्छ्याएका खेलाडीको सूचीबाट अक्सनमा सहभागी हुने खेलाडीहरुको अन्तिम नामावली प्रकाशन गरिने क्यानको भनाइ छ।
क्यानले दोस्रो सिजनको एनपिएल आगामी नोभेम्बरमा गर्ने तयारी गरिरहेको छ।
