काठमाडौं । नेपाली कांग्रेसका सभापति गगनकुमार थापाले पार्टीको १५औँ महाधिवेशनअन्तर्गत केन्द्रीय कार्यसमितिका लागि भइरहेको निर्वाचनमा कुनै पनि प्यानल वा गुट नरहेको स्पष्ट पारेका छन्। आफ्नो नाम जोडेर विभिन्न उम्मेदवारको सूची प्रचारप्रसार भइरहेको भन्दै उनले त्यस्ता सूचीलाई आफ्नो आधिकारिक समर्थन वा सिफारिसका रूपमा नबुझ्न आग्रह गरेका छन्।
शुक्रबार सामाजिक सञ्जाल फेसबुकमार्फत आफ्नो धारणा सार्वजनिक गर्दै थापाले पार्टीको आन्तरिक लोकतान्त्रिक प्रक्रियामा महाधिवेशन प्रतिनिधिहरूलाई कुनै पनि भ्रम वा प्रभावमा नपरी स्वतन्त्र विवेकका आधारमा मतदान गर्न आग्रह गरेका हुन्।
‘यसपटक कुनै पनि प्यानल वा गुट छैन,’ थापाले आफ्नो सन्देशमा उल्लेख गरेका छन्। आफ्नो नामसँग जोडेर प्रचार गरिएका उम्मेदवारहरूको सूचीलाई आधिकारिक समर्थनका रूपमा नलिन आग्रह गर्दै उनले कुनै पनि अफवाहमा नलाग्न महाधिवेशन प्रतिनिधिहरूलाई अनुरोध गरेका छन्।
थापाले महाधिवेशन प्रतिनिधिहरूले पार्टीको सर्वोपरि हितलाई ध्यानमा राख्दै आफ्नै मूल्याङ्कन, विवेक र विश्वासका आधारमा मतदान गर्नुपर्नेमा जोड दिएका छन्। प्रतिनिधिहरूको विवेकपूर्ण निर्णयले पार्टी संगठनलाई नयाँ उचाइमा पुर्याउने विश्वाससमेत उनले व्यक्त गरेका छन्।
यसैबीच, केन्द्रीय कार्यसमितिका लागि हिजो तय भएको मतदान प्राविधिक कारणले एक दिन ढिलो भएकोप्रति थापाले क्षमायाचना गरेका छन्। मतदान प्रक्रिया सुरु भइसकेको उल्लेख गर्दै उनले यसबाट महाधिवेशन प्रतिनिधिहरूमा पर्न गएको असुविधाप्रति दुःख व्यक्त गरेका छन्।
लोकतान्त्रिक अभ्यासलाई मर्यादित, संयमित र उत्साहपूर्ण बनाउन आग्रह गर्दै थापाले सबै प्रतिनिधिलाई निर्वाचन प्रक्रियामा सक्रियतापूर्वक सहभागी हुन आह्वान गरेका छन्।
उनको सन्देशले महाधिवेशनका क्रममा उम्मेदवारहरूको नाम जोडेर भइरहेका प्रचारप्रसारबारे आफ्नो धारणा स्पष्ट पार्ने र प्रतिनिधिहरूलाई स्वतन्त्र निर्णयका लागि आग्रह गर्ने उद्देश्य राखेको देखिन्छ।
