जर्मनी आगामी वर्ष कतारमा आयोजना हुने फिफा विश्वकप फुटबलका लागि छनोट हुने पहिलो टिम बनेको छ ।विश्वकपको युरोपियन छनोट अन्तर्गत गयराति नर्थ म्यासेडोनियालाई ४–० गोल अन्तरले पराजित गर्दै जर्मनी दुई खेल अगाबै विश्वकपका लागि छनोट भएको हो ।
जर्मनीको जितमा टिमो वेर्नरले दुई गोल गर्नुभयो । काइ हाभर्ट्ज र जमाल मुसियालाले भने एक–एक गोल गर्नुभयो ।हाभर्ट्जले खेलको ५० औं मिनेटमा गोल गर्दै जर्मनीलाई अग्रता दिलाउनुभएको थियो ।वेर्नरले ७० औं र ७३ औं मिनेटमा लगातार दुई गोल गर्दा जर्मनीले ३–० को अग्रता बनायो ।त्यसपछि मुसियालाले खेलको ८० औं मिनेटमा गोल गर्दै जर्मनीलाई ४–० को जित दिलाउनुभयो ।
जितसँगै समूह ‘जे’ बाट जर्मनीले दुई खेल अगाबै विश्वकपमा आफ्नो सिट पक्का गरेको हो ।यस समूहमा जर्मनी ८ खेलमा २१ अङ्क जोडेर शीर्ष स्थानमा रहेको छ ।अब जर्मनीले लिचेस्टाईन र अर्मेनियासँग खेल्नेछ ।
