दाङ, २१ असोज ।
दाङ जिल्ला भलिबल संघको आज सम्पन्न अधिवेशनले नयाँ कार्यसमिति पुनर्गठन गरेको छ। अधिवेशनबाट लक्ष्मण बस्नेतको अध्यक्षतामा जिल्ला भलिबल संघको नयाँ कार्यसमिति चयन गरिएको हो।
पुनर्गठित कार्यसमितिको उपाध्यक्षमा भरत कवर र भूमिसरा बाठा मगर चयन भएका छन्। त्यसैगरी महासचिवमा दुर्लभ श्रेष्ठ र कोषाध्यक्षमा ईश्वर केसी चयन भएका छन्।
सदस्यहरूमा नवराज खत्री, राजु एरी, लिलाबहादुर घर्ती, कमल दशौदी, पूरण विक र जितेन्द्रबहादुर चौधरी चयन भएका छन्।
नयाँ कार्यसमितिमा दुई सदस्य पद भने पछि थप गरिने जनाइएको छ।
अधिवेशनले जिल्लामा भलिबल खेलको विकास, खेलाडीको क्षमता अभिवृद्धि तथा प्रतियोगितालाई थप व्यवस्थित रूपमा अघि बढाउने उद्देश्यसहित नयाँ नेतृत्व चयन गरेको हो।
नवनिर्वाचित कार्यसमितिले जिल्लामा भलिबल खेलको विकास र विस्तारसँगै प्रतिभावान् खेलाडीको पहिचान तथा प्रोत्साहनमा जोड दिने अपेक्षा गरिएको छ।
अधिवेशन दाङ जिल्ला भलिबल संघका उपाध्यक्ष भरत कवरको अध्यक्षता तथा नेपाल भलिबल संघका केन्द्रीय उपाध्यक्ष भीम वलीको प्रमुख आतिथ्यमा सम्पन्न भएको थियो ।
