कविता

मेरो कविता
तिम्रो दिल कहिल्यै छुन नसकेको
तिम्रो कहिल्यै आफ्नो हुन नसकेको
फगत् अर्थहीन शब्दहरुको गुजुल्टो
मेरो कविता
षडयन्त्रको तानाबाना बुन्न नजानेको
को आफ्नो को पराई चिन्न नजानेको
फगत् तिम्रो कालो पिरतीमा अन्धो
मेरो कविता
काव्य नियम तोड्नलाई कुनै भय नभएको
कव्यरस ताल श्रृङ्गार कुनै लय नभएको
फगत् चुँडेको सारङ्गीको तार जस्तो
मेरो कविता
शिशिरमा बिछोडको तुषारोले नुहाउने
ग्रीष्ममा यादहरुको धुनी बाली निदाउने
फगत् तिम्रो उपेक्षामा बहुला भएको
मेरो कविता
पिडा रोदन क्रन्दन अनि कहिल्यै नहाँसेको
शोभनीय आभुषण अलंकार नगाँसेको
फगत् मरुभूमिमा विलाइजाने एक थोपा आँशु
मेरो कविता
सुनका पङ्ख हालेर नि उड्न नसकेको
पिरतीको कमजोर गलपासो चुँड्न नसकेको
फगत् भावनाहरुको कमजोर त्यान्द्रो
मेरो कविता
तिमीले आँखैमा राख्दा झन् बिझाउने
मनमा राख्दा तिम्रो मगजले गिज्याउने
फगत् तिम्रै श्राप र उपेक्षाको उपज
मेरो कविता