जेठ २५, दाङ ।
सुदूरपश्चिम प्रदेशमा नेकपा एमालेमा भाँडभैलो भएको छ । पार्टी फुटनजिक पुग्दा सुदूरपश्चिम प्रदेशमा नेताहरूबीच कुटाकुट भएको खबर सार्वजनिक भएको छ । पार्टीको आन्तरिक विवादको रोष अब नृताहरुका बिचमा देखा पर्न थालेको छ ।
सुदूरपश्चिम प्रदेश सरकारका भौतिक पूर्वाधार विकास मन्त्री रहेका माधव नेपाल गुटका नेता दीर्घ सोडारीले एमाले सुदूरपश्चिम सचिव केपी ओली गुटका राजेन्द्र सिंह रावलमाथि हातपात गरेको आरोप लागेको छ ।
सोमबार साँझ मन्त्रीकै कार्यकक्ष भित्र हातपात भएको सचिव रावलको दावी छ । मुख्यमन्त्री त्रिलोचन भट्टलाई विश्वासको मत नदिन निर्देशनसहितको पत्र बुझाउन मन्त्रालय गएको बेला सोडारीले आफ्नो कठालो समातेर दुर्व्यवहार गरेको रावलको आरोप छ ।
मन्त्री सोडारीको सचिवालयले भने विज्ञप्ति जारी गर्दै रावलले नै मन्त्री सोडारीमाथि दुर्व्यहार गरेको दाबी गरेको छ ।
