हस्त चौलागाँई
चैत्र ५, कालिकोट ।
कालिकोटमा पछिल्ला वर्षमा बालविवाहको घटनामा कमी आउन थालेको छ । जिल्ला प्रहरी कार्यालय कालिकोटका अनुसार गत आर्थिक वर्षमा २ वटा मात्रै वालविवाहको उजुरी परेको थियो ।
चालु आर्थिक वर्षमा हालसम्म पनि कुनै पनि उजुरी नपरेको कालिकोट प्रहरीले जनाएको छ । कालिकोटमा वालविवाह कम हुँदै जानुमा बाल क्लब, बालअभियान्ता र बाल पत्रकारहरूको भूमिकालाई महत्वपूर्ण मानिएको छ । शुभकालिका गाउँपालिका वडा नम्बर ८ का कमल तिमल्सेनाले साथीहरूसँग मिलेर बालक्लब मार्फत बालविवाह अन्त्यका लागि सूचना दिने र जागरण फैलाउने काम गरिरहेको बताउनुभयो । कालिकोटमा रहेका अन्य वालक्लव र अभियान्ताहरूले पनि बालविवाह अन्त्यको लागि भूमिका खेलेका छन् ।
विभिन्न गैह्र सरकारी संस्थाको सहयोगमा कालिकोटका बालअभियानताहरूले पत्रकारिताको आधारभूत तालिम पनि लिएका छन् । जसका कारण सामुदायिक रेडियोमा समुदाय स्तरको समाचार टिपाउन र बालविवाह विरुद्धको अभियान चलाउन पनि सजिलो भएको शुभकालिका गाउँपालिका ३ का पार्वती अधिकारीले बताउनुभयो । कालिकोटको तिलागुफा नगरपालिका र शुभकालिका गाउँपालिकामा मात्रै १ सय १९ वटा बालक्लव छन् जसमा ३ हजार ६ सय ८२ जना बालबालिका आवद्ध रहेका छन् ।
उनीहरू अहिले पढाइ सँगसँगै बालविवाह, छुइ प्रथा, जातिय विभेद देखि अन्य सामाजिक विभेद बिरुद्धमा वकालत गरिरहेका छन् । बालबालिकाको यो अभियानले प्रहरीलाइ पनि सजिलो भएको जिल्ला प्रहरी कार्यालय कालिकोटका प्रमुख सिद्धराज न्यौपानेले बताउनुभयो ।
आफ्नै उमेर समूहका साथीभाईलाई पर्ने समस्या बुझ्ने, समाधानको लागि छलफल गर्ने र सरोकारवालाको साथ लिने काम पनि बालबालिकाले गरिरहेका छन् । बाल अभियान्ताहरू बालविवाह सँगै जातिय छुवाछुत, महिला हिंसा, लैङ्गिक विभेद, लगायत समाजमा रहेका गलत अभ्यास अन्त्यका लागि एकजुट बनिरहका छन् ।