साउन २९, दाङ ।
एमालेका अध्यक्ष केपी शर्मा ओलीले आगामी निर्वाचनका लागि सत्तारुढ गठबन्धन बनाएको प्रति असन्तुष्टि जनाउनुभएको छ ।
शनिबार लोकतान्त्रिक शेर्पा संघको कार्यक्रमलाई सम्बोधन गर्दै अध्यक्ष ओलीले निर्वाचन पहिल्यै गठबन्धन बनाएको प्रति असन्तुष्टि जनाउनुभएको हो ।
अध्यक्ष ओलीले एक्लाएक्लै चुनाव लड्ने र चुनावपछि सरकार गठनका लागि गठबन्धन बनाउनुपर्ने भए पनि एमालेलाई रोक्न गठबन्धन भइरहेको बताउनुभएको हो ।
चुनावमा आफ्नो गठबन्धन लिएर जानुपर्ने र चुनावपछि कसको सरकार बनाउने भन्ने गठबन्धनमा जानुपर्ने उहाँको भनाइ थियो । एमालेलाई बहुमत ल्याउन रोक्नका लागि यो गठबन्धन भएको उहाँको भनाइ छ ।
एमालेले देशको विकासका योजना लिएर अगाडि बढेको बताउँदै ओलीले त्यसबाट आत्तिएकाहरू गठबन्धन बनाउन लागेको दाबी गर्नुभयो ।
जनताका इच्छा, आवश्यकताहरूलाई बुझेर यिनीहरूलाई पूरा गर्न, देशबाट गरिबी, असमानता, भेदभाव हटाउने सामाजिक न्याय र समृद्धिको चाहनालाई पूरा गर्नका लागि पनि एमालेले जित्नुपर्ने उहाँले बताउनुभयो ।
