कनिका खबर
असोज ५, लमजुङ
लमजुङमा यातायात सम्बन्धि काम अब जिल्लाबाटै हुने भएको छ । गाडीको ब्लुबुक नवीकरण, जाँचपास र रुट परमिट लगायत काम गर्न लमजुङका नागरिक अब पोखरा धाइरहनु पर्ने छैन । गण्डकी प्रदेश सरकारले जिल्लामा यातायात व्यवस्था सम्बन्धी सेवा हिजोदेखि सुरु गरेको छ । गण्डकी प्रदेशका मुख्यमन्त्री पृथ्वीसुब्बा गुरुङले हिजो आफ्नै कार्यालयको एक्सन रुमबाट क्लिक गरी लमजुङका सेवाग्राहीको ब्लुबुक नवीकरण रसिद प्रिन्ट गर्नुभएको हो । उक्त रसिद पूर्वाधार विकास कार्यालय लमजुङका प्रमुख सुमन गिरीले कार्यालयमा सेवा लिन आएका पहिलो सेवाग्राही यज्ञनारायण श्रेष्ठलाई हस्तान्तरण गर्नुभयो । यसअघि पोखराको कास्की, बाग्लुङ, तनहुँको डुम्रेमा मात्रै यातायात व्यवस्थाका सेवा उपलब्ध हुदै आएको थियो ।
गण्डकी प्रदेश सरकारले स्याङ्जा, लमजुङ र गोरखामा यातायात व्यवस्था सम्बन्धी सेवा थप गरेको हो । अब पूर्वाधार विकास कार्यालयबाट ब्लुबुक नवीकरण, सवारी साधन कर संकलन, सवारी जाँचपास, रुट परमिट नवीकरण, सवारी आयकर र पटके रुट परमिट सम्बन्धी सेवा उपलब्ध हुने पूर्वाधार विकास कार्यालय लमजुङका प्रमुख सुमन गिरीले बताउनुभयो ।